DILI, 17 setembru 2024 (TATOLI)—Membru Parlamentu Nasionál (PN) liuhusi Deputada PLP, Maria Angelina Sarmento, husu Governu atu koordena ho Igreja liuliu Konferénsia Episkopál Timorense (CET, siglá portugés) atu transforma Tasi-Tolu sai sentru relijiozu turístiku.
Notísia Relevante: PR Horta husu Governu-Igreja koordena transforma Tasi-Tolu ba sentru relijiozu turístiku
“Ha’u hakarak sujere, ba medida, ita foin ramata selebrasaun misa husi Santu Padre nian, husu Governu atu tau atensaun ba fatin hanesan iha Tasi-Tolu. Liuliu, presiza kria plaka ida iha ne’eba ne’ebé halo istória breve ida kona-ba vizita Santu Padre nian ema hirak mak tama iha ne’eba, depois sita husi ne’e hahú husi sá loron, momentu istóriku ida-ne’e ita presiza hakerek,” Nia hato’o liuhusi reuniaun plenária PN, tersa ne’e.
Tanba, nia dehan, iha fatin istóriku barak mak Governu failla atu iha istória breve ida tau iha ne’eba, hodi nune’e iha futuru ema mai haree karik la presiza husu verbal ba seguransa ka ema ruma destakadu hein iha ne’eba.
“Nune’e, ema ba iha ne’eba haree de’it plaka ne’eba hatene ona, iha 09 setembru 2024, Papa nia vizita no iha 10 setembru misa iha Tasi-Tolu ema ho totál rihun 600-resin ka rihun 700 mak tama iha ne’e tuir misa. Istória boot Timor-Leste halo iha tempu ne’eba, lembransa Governu da-sia nian lideradu husi Primeiru-Ministru, Kay Rala Xanana Gusmão, pelumenus buat ruma hakerek iha ne’eba,” nia rekomenda.
Nia dehan, agora hanesan ema hotu haree iha Kristu Rei ne’e laiha buat ida hakerek iha ne’eba, inklui iha uma adat Papa João Paulo mai vizita mós hanesan laiha plaka ruma.
Notísia Relevante: Igreja husu ema hotu proteje esplanada Tasi-Tolu
Nune’e, nia husu orsamentu millaun $12 ne’ebé antes ne’e aloka hodi halo preparasaun simu vizita Santu Padre, karik sei iha aproveita atu dezenvolve fatin ne’e ba oin Timor-Leste iha istória ida eskrita la’ós verbál de’it.
Nia mós sujere, atu kria regra ba vizitante sira bainhira vizita iha fatin Tasi-Tolu no tama karik mantein nafatin nu’udar sai fatin sagradu.
Deputadu CNRT, Natalino dos Santos, mós husu Governu atu serbisu hamutuk Igreja dezenvolve fatin Tasi-Tolu sai fatin sentru turizmu relijiozu.
Vise Ministru ba asuntu Parlamentár, Adérito Hugo da Costa, hateten kona-ba jestaun kontinuasaun ba altar misa ba Sua Santidade Papa Francisco iha Tasi-Tolu ho altar antigu vizita Papa João Paulo II tama ona pakote ida bainhira Governu prepara simu vizita Papa Francisco nian, hanoin ona oinsá ba futuru espasu rua ne’e atu halo prezervasaun.
“Tan ne’e, orsamentu ne’ebé millaun $12 ne’ebé aloka ne’e kalkulu ba prozesaun sira-ne’e iha hotu, maibé ha’u labele pronúnsia implementasaun millaun $12 to’o iha ne’ebé. Maibé, hakarak adianta de’it katak, iha implementasaun orsamentu millaun $12 ne’e la to’o millaun $12, komisaun organizadora sei halo aprezentasaun ba ninia akontabilidade no seu todo ba gastu ida-ne’e ba públiku. Tanba, atu halo jestaun ba millaun $12 ne’e liuhusi dekretu-lei rejime espesiál ida ba implementasaun ba preparasaun hotu-hotu,” nia dehan.
Notísia Relevante: Marco Sprizzi: Konstrusaun altar santu iha Tasi-Tolu sei hela hanesan muzeu
Jornalista : Nelson de Sousa
Editór : Cancio Ximenes
