OÉ-CUSSE, 23 Setembru 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhusi Sekretaria Rejionál ba Asuntu Administrasaun finaliza ona programa sosializasaun kona-ba kritériu estabelesimentu ba foun.
Tanba ne’e, Sekretáriu Rejionál ba Asuntu Administrasaun, André Lao, sei realiza semináriu ida hodi konvida entidade hotu atu kontribui ideia molok submete proposta esbelesimentu suku foun sira ba Governu sentrál.
“Agora, ha’u planu ho ekipa atu finaliza ikusliu ho semináriu ida, ne’ebé sei realiza iha loron 27 Setembru ne’e, atu konvida intelektuál, igreja, sosiedade sivíl no autoridade lokál suku 18 atu partisipa hodi hato’o sira-nia opiniaun ho krítika no realiza dialogu. Ikus, hamosu relatóriu ida depois sei asina husi Prezidente Autoridade RAEOA atu apezenta ba primeiru-ministru”, André Lao dehan ba Tatoli iha Oé-Cusse, ohin.
Notísia relevante: Autoridade RAEOA introdús kritéria atu estabelese suku iha Pante Makasar
Nia salienta katak fulan ida tomak ekipa halo sozializasaun bá suku sira enkoraja sira hodi hatama proposta foun.
“Proposta foun ho tuan hamutuk suku 10. Sira prepara ona atu sai suku. Ami sai bá sosializa bazeia ba sira-nia proposta no hakarak atu sai suku. Tan ne’e, ita bá esplika kritéria atu sai suku ne’e tenke iha populasaun, baliza suku tenke klaru, tenke iha infraestrutura Governu hanesan ba edukasaun, saúde no seluk tan”, nia dehan.
Suku 10 ne’ebé sei sai suku foun iha sub-rejiaun Pante Makasar mak suku Costa, ne’ebé sei kria tan suku foun rua, mak Monemeko no Kutete; suku Cunha atu kria suku rua mak Maunaebeno no Cunha B no Suku Taiboko sei hamosu tan suku foun ida mak Taiboko B.
Iha sub-rejiaun Oésilo, suku Bobometo kria tan suku foun rua mak Bobo-Ufe no Bobomanat. Iha sub-rejiaun Pássabe, suku Abani sei estabelese tan suku foun rua mak Haemnanu no Bankeko. Iha sub-rejiaun Nítibe, suku Lela-Ufe sei kria suku foun ida mak Hao-Ufe.
“Suku sira ne’e hotu ami sosializa ona, bá halo dialogu ho sira, depois finaliza liuhusi asinatura ata reuniaun ida ne’e hatudu katak ema hothotu hakarak, tanba marka prezensa iha sosializasaun ne’e mai husi entidade hotu”, realsa.
Notísia relevante: Autoridade RAEOA prioriza asuntu estabelesimentu suku foun iha Oé-Cusse
Jornalista: Abílio Elo Nini
Editora: Maria Auxiliadora
