OÉ-CUSSE, 06 Agostu 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhusi Sekretariu Rejionál ba Asuntu Administrasaun introdús kritériu atu estebelese suku foun iha sub-rejiaun Pante Makasar.
Sekretáriu Rejionál ba Asuntu Administrasaun, André Lao, hateten atividade sosializasaun ne’e atu informa populasaun sira, liuliu iha suku alvu sira-ne’ebé hakarak harii suku no aldeia foun.
Tanba ne’e, persiza atu hatene hodi prienxe kritériu sira mak hanesan totál populasaun mínimu rihun 3, rai no kultura tenke klaru no rekursu tenke eziste iha suku laran hanesan edukasaun, saúde, bee-moos, liuliu infraestrutura bázika tenke iha.
“Ohin halo abertura ba sosializasaun iha Naimeko no sei finaliza iha 25 Agostu. Kuandu dadus kompletu ona, ikusliu sei halo semináriu ida hodi konvida sosiedade sivíl, autoridade lokál, joven feto-mane no intelektuál Oé-Cusse oan sira atu kontribui ideia molok estabelese suku foun ne’e iha Oé-Cusse”, André Lao dehan iha sede suku Naimeko.
Notísia relevante: Governu sei avalia suku hitu iha Oé-Cusse molok válida sai suku foun
Membru autoridade ne’e salienta katak hafoin simu pose, nia parte forma kedan komisaun no rekolla dadus iha suku hitu ne’ebé kompleta ona dadus atu prepara sai suku foun no suku rua sekuk foin mak submete tan dokumentu.
“Oé-Cusse iha suku sia. Agora, iha ona dadus provizóriu suku hitu nian, maibé suku foun rua mai tan no sira-nia dadus submete ona ba komisaun. Tan ne’e, bazeia ba proposta husi baze, sira mak hakarak, entaun iha buka meiu oinsá atu rezolve”, nia hatutan.
Xefe Unidade Koordenasaun Serbisu Administrativu RAEOA no Ataúro, Sebastião Pereira, agradese tanba komisaun esforsa hodi rekolla ona dadus ba suku hitu no falta suku rua mak persiza kompleta iha tinan ne’e.
Nune’e, bele prevee kedan nia Orsamentu Jerál Estadu (OJE) 2025 nian, tanba dadus ne’ebé rekolla sei submete ba nasionál no sei verifika fali, tanba iha kritéria balun tenke haree.
“Se Oé-Cusse hakarak estabelese suku foun, 2024 ne’e tenke tau ona orsamentu. Karik eleisaun akontese 2025 ne’e, xefe suku foun sira bele hala’o knaar ho orsamentu ne’e, se la’e fó todan fali ba RAEOA oinsá mak atu buka orsamentu”, nia sujere.
Xefe suku Naimeko, Marcos Liu Abi, agradese ba Governu tanba hakarak kria tan suku foun hodi hakbesik ba povu, liuliu suku ne’ebé ho área luan.
“Iha Naimeko mós sai alvu atu estabelese suku foun iha futuru, tan ne’e ha’u hanesan autoridade lokál agradese ba Governu, katak bele redús burokrasi tanba durante ne’e ha’u-nia suku luan, maibé kuandu harii tan suku ida bele hakbesik liu atendimentu suku no dezenvolvimentu ba to’o baze”, nia espera.
Notísia relevante: autoridade-raeoa-prioriza-asuntu-estabelesimentu-suku-foun-iha-oe-cusse/
Suku foun iha sub-rejiaun Pante Makasar ne’e mak daudaun aldeia Oétfo no Lakufoan ne’ebé sei muda ba suku Mone-Meko, hafahe husi suku Costa; aldeia Mahata sai suku Kutete, hafahe husi suku Costa; aldeia Maunaebeno sai suku Maunaebeno, hafahe husi suku Cunha, no suku Taiboko B hafahe husi suku Taiboko.
Iha sub-rejiaun Oésilo, suku Bobometo B hafahe husi suku Bobometo, iha sub-rejiaun Pássabe suku Haemnanu hafahe husi suku Abani, no iha sub-rejiaun Nítibe, suku Hao-Beno hafahe husi suku Lela-Ufe.
Jornalista: Abílio Elo Nini
Editora: Maria Auxiliadora
