OÉ-CUSSE, 25 Setembru 2024 (TATOLI) – Diresaun Nasionál Terra no Propriedade (DNTP) Oé-Cusse submete, ohin, kazu tolu kona-ba disputa rai ba Komisaun Terra no Propriedade hodi rezolve no fó solusaun ida-ne’ebé justu no independente ba populasaun sira.
Diretór Sevisu Terra no Propriedade Oé-Cusse, Júlio Coel, hateten papél komisaun nian mak atu rezolve kazu sira iha territóriu, maibé tanba Oé-Cusse to’o agora foin mak submete kazu tolu, ne’ebé antes ne’e halo ona mediasaun iha suku, maibé laiha solusaun.
Tanba ne’e, dirijente Servisu Terra no Propriedade espera kazu tolu ne’ebé submete ona ba komisaun bele hetan solusaun.
“Kazu sira-ne’e akontese tanba rai no ita halo ona mediasaun, maibé laiha solusaun. Entaun, ami labele foti dezisaun, tenke enkamiña ba komisaun hodi fó desizaun”, Júlio Coel dehan iha ámbitu sensilibizasaun rejime juridiku ba definisaun titularidade direitu propriedade bens imóveis, iha sede suku Costa, ohin.
Nia salienta katak ho divulgasaun ne’e komunidade sira iha ona koñesimentu bainhira iha problema kona-ba rai bele ba diretamente Komisaun Terra no Propriedade.
Notísia relevante: Komisaun Terra no Propriedade introdús rejime jurídiku direitu bens imóveis iha Oé-Cusse
Iha fatin hanesan, Komisáriu Terra no Propriedade, Románio Guterres, agradese tanba RAEOA nia kazu ida konsege rezolve ona, nune’e nia espera kazu ne’e sei iha solusaun iha fulan neen nia laran.
“Iha RAEOA ne’e, kazu ida de’it mak ami konsege rezolve ona, barak mak pendente hela iha Oé-Cusse. Provizoriamente fó ona mai ami komisaun iha kazu tolu atu lori bá nasionál, tanba kazu ne’e liu ona husi mediasaun iha suku to’o Terra no Propriedade, maibé laiha solusaun. Entaun, sira hakarak entrega ba komisaun atu rezolve”, nia hateten.
Komisáriu ne’e lakohi esplika detalla kona-ba kronolojia husi kazu tolu ne’e, tanba segredu no prosesu análize ho prazu fulan neen tenke iha ona solusaun husi Komisaun Terra no Propriedade.
“Ha’u labele esplika ba imi, tanba nia tipu kazu ne’e lahanesan tanba kazu ida ne’e sira hasoru Estadu ne’e mak sira hakarak hato’o fali ba komisaun. Kazu rua seluk ne’e entre privadu mak disputa hela”, salienta.
Nia esplika katak kazu tolu ne’e mak kuandu hatama ona, sei depende fali ba nia oráriu sorteiu ne’e, karik entrega ona ba komisáriu ne’ebé kaer kazu ne’e, entaun hahú sura ona husi loron nia simu ne’e to’o fulan neen desizaun tenke sai ona.
“Bainhira desizaun sai, ita sei notifika parte rua halo audiénsia depois bá halo verifikasaun iha terrenu atu justifika rai ne’e iha ka la’e no tuir duni deklarasaun ne’ebé hato’o ka la’e? Tenke iha serteza”, nia afirma.
Notísia relevante: DNTP Oé-Cusse rekolla reseita $10.535 husi arrendamentu rai no uma Estadu
Komisaun Terra no Propriedade hala’o knaar bazeia ba Dekretu-lei númeru 5/2020, loron 06 fulan-Fevereiru, kona-ba organizasaun no funsionamentu komisaun propriedade, no Lei númeru 13/2017, loron 05 fulan-Juñu, sobre rejime jurídiku ba definisaun titularidade direitu propriedade bens imóveis.
Jornalista: Abílio Elo Nini
Editora: Maria Auxiliadora
