DILI, 25 setembru 2024 (TATOLI)—Governu liuhusi reuniaun Konsellu Ministru (KM) ordinária, deside fó instrusaun ba Ministra Saúde, Élia A.A. dos Reis Amaral, atu halo levantamentu detalladu kona-ba dívida ezistente no prazu pagamentu iha ospitál rai-li’ur, ne’ebé antes ne’e iha kooperasaun serbisu Governu Timor-Leste hodi halo transferénsia pasiente halo tratamentu saúde.
“Inisiativa ne’e ho objetivu atu rezolve pagamentu ba dívida ezistente ba ospitál sira iha rai-li’ur no garante kontinuidade servisu saúde nian,” referidu nota ezekutivu ne’ebé Agência Tatoli asesu hafoin reuniaun ezekutivu iha Palásiu Governu, kuarta ne’e.
Notísia relevante : PM Xanana orienta MS selu dívida iha ospitál Malázia-Singapura-Indonézia
Aleinde ne’e, fó instrusaun ba ministériu tutela atu haree verba sira ne’ebé disponível atu realiza kompromisu sira ne’e.
“Ministra Saúde tenke estabelese kritériu prioritizasaun ba pagamentu, bazeia ba urjénsia servisu, risku ba saúde públika no impaktu ba operasaun ospitál nian,” nota husi ezekutivu, fó sai.
KM mós fó instrusaun ba Ministra Saúde atu hahú halo negosiasaun ho ospitál sira hodi reestrutura dívida sira no propoin ba Ministériu Finansa halo reforsu orsamentu ida ba setór saúde nian.
Implementasaun husi medida sira-ne’e sei hetan monitorizasaun husi grupu traballu ida-ne’ebé kria espesifikamente ba objetivu ida-ne’e, ne’ebé tenke aprezenta relatóriu periódiku sira ba KM kona-ba progresu ne’ebé alkansa ona iha likidasaun dívida ospitál nian.
Daudaun ne’e Governu Timor-Leste halo kooperasaun serbisu ho ospitál tolu iha Indonézia, Malázia no Singapura.
Maioria pasiente ne’ebé halo tratamentu iha rai-li’ur ho moras króniku hanesan kankru no fuan.
Tuir dadus, pasiente hamutuk 195 hala’o tratamentu iha rai-liur, hahú husi janeiru to’o setembru 2023, ne’ebé husi númeru ne’e pasiente na’in-ualu mak hakotu ona iis.
Jornalista : Osória Marques
Editora : Julia Chatarina
