DILI, 24 setembru 2024 (TATOLI)—Vise Ministru ba asuntu Parlamentár, Adérito Hugo da Costa, hateten Governu sentrál liuhusi Primeiru Ministru (PM), Kay Rala Xanana Gusmão, orienta ona Ministériu Saúde (MS) atu rezolve lalais hodi selu dívida iha ospitál Malásia, Singapura no Indonézia.
Notísia Relevante: Ministériu Saúde seidauk selu ospitál tolu iha estranjeiru
Iha Orsamentu Jerál Estadu (OJE) 2023 ho orsamentu retifikativu 2023 no OJE 2024 mós prevee atu selu dívida sira-ne’e, maibé dívida sira-ne’e ministériu akompaña hela ospitál sira-ne’e, tanba husi MS pronúnsia dezde inísiu katak, tanba ho montante ne’ebé aumenta boot, entaun antes sira halo pagamentu tenke halo investigasaun ka auditoria.
Maibé, nia dehan, bainhira hanoin halo auditória loloos halo no la hein tan ho montante dívida aumenta tan, agora kuaze millaun $20, tan ne’e Governu sentrál simu ona informasaun husi ospitál sira-ne’e hodi orienta MS atu rezolve lalais.
“Orientasaun husi Konsellu Ministru liuhusi Primeiru-Ministru ba Ministériu Saúde atu imediatamente halo kontaktu ho ospitál sira-ne’e atu rezolve asuntu ne’e ho lalais,” Nia hateten ba jornalista sira iha resintu Parlamentu Nasionál (PN), tersa ne’e.
Liuhusi korespondénsia ne’ebé Governu sentrál hetan husi ospitál hirak ne’e, ho informasaun ne’ebé iha, orienta ona ba Ministériu Saúde atu imediatamente halo kontaktu ho ospitál sira-ne’e direta hodi rezolve tiha dezentendimentu ne’ebé iha hodi fó fali konfiansa ba ospitál sira-ne’e.
Dahuluk, atu labele impede transferénsia moras sira husi Hospital Nasionál Guido Valadares (HNGV) ba ne’eba.
Daruak, atu labele haruka fila pasiente sira iha ne’eba ne’ebé sei iha hela prosesu tratamentu iha ospitál sira-ne’e.
Tanba ne’e, orienta ona ba MS no MS ho meiu saida de’it tenke halo kontaktu ho ospitál sira ne’e hodi rezolve ona dívida ne’ebé iha lori naran Estadu nian hodi fó fali konfiansa ho ospitál sira ne’e.
Se iha planu ruma mak MS atu halo auditória ne’e parte ketak ida, maibé importante mak tenke fó nafatin andamentu ba ospitál sira-ne’e hodi fó tratamentu saúde ba pasiente sira.
Mezmu nune’e, Vise Ministru ne’e seidauk hatene bainhira mak MS bele halo pagamentu ba dívida ne’e, maibé Governu sentrál orienta ona atu MS rezolve asuntu ne’e ho lalais.
“Seidauk hatene maibé orientasaun husi Konsellu Ministru, husi Primeiru-Ministru ba Ministériu Saúde atu imediatamente halo kontaktu ho ospitál sira-ne’e, atu rezolve asuntu ne’e ho lalais,” nia hateten.
Entretantu, iha reuniaun plenária Parlamentu Nasionál, tersa ne’e, Deputadu PLP, Maria Angelina, kontinua levanta kona-ba informasaun ne’ebé simu husi ospitál tolu iha rai-li’ur la simu ona pasiente foun ne’ebé transfere husi Dili ba ne’eba, nune’e Ministériu Saúde presiza tau atensaun atu selu lalais dívida sira-ne’e.
Notísia Relevante: Membru PN husu MS selu dívida iha ospitál Malázia-Singapura
Jornalista : Nelson de Sousa
Editór : Cancio Ximenes
