DILI, 25 setembru 2024 (TATOLI)—Komisaun C trata asuntu Finansa Públika iha Parlamentu Nasionál (PN), kuarta ne’e, hahú diskute preparativu sira bainhira simu proposta Orsamentu Jerál Estadu (OJE) 2025 husi Governu.
Tanba, nia hateten, tuir Lei Enkuadramentu Orsamentál (LEO) iha 01 outubru 2024 ne’e, parte ezekutivu tenke submete ona ba órgaun lejislativu ne’e.
Notísia Relevante: Governu tenke submete proposta-Lei OJE 2025 ba PN iha 01 outubru
“Ami ohin ko’alia kona-ba preparasaun komsiaun hodi simu Orsamentu Jerál Estadu (OJE) 2025, ne’ebé mak tuir Lei Enkuadramentu Orsamentál (LEO) iha 01 Outubru tenke submete mai iha Parlamentu Nasionál, signfika tersa semana oin,” Prezidente Komisaun C, Cedelízia Farria dos Santos, informa ba jornalista sira hafoin ramata reuniaun komisaun iha PN, kuarta ne’e.
Ho nune’e. nia hateten, Komisaun C iha Parolamentu Nasionál hahú halo diskusaun preparativu sira bainhira proposta OJE 2025 mai ona PN, no hafoin ne’e Parlamentu Nasionál sei halo panorama orsamentál.
Nia hein, proposta OJE 2025 tama mai Parlamentu Nasionál ho pedidu normal, no labele ho pedidu urjénsia hanesan tinan kotuk ne’e bele konsidera Governu foun.
Maibé, tuir nia, agora Governu liu ona tinan ida resin mak komisaun nia haree bele tama ho pedidu normál hodi nune’e membru Parlamentu Nasionál sira bele halo diskusaun kle’an.
Durante enkontru, Komisaun diskute mós kalendáriu no kalendáriu ne’e bainhira submete proposta OJE 2025 iha 01 outubru tinan ne’e.
Signifika, hafoin loron 10-12 outubru 2024 ne’e sei halo panorama orsamentál, hafoin kontinua ho audiénsia públika no tuir kalendáriu tentativa ne’e iha 04 movembru 2024 ne’e, bele tama ona diskusaun iha jeneralidade iha plenária parlamentgár.
Jornalista : Nelson de Sousa
Editór : Cancio Ximenes
