DILI, 25 setembru 2024 (TATOLI)—Ministériu Edukasaun (ME) kontinua hasa’e kualidade dirijente eskola foun sira liuhosi formasaun jestaun eskolár no finanseiru.
“Objetivu husi formasaun ne’e la’ós haree de’it ba kestasaun operasionál maibé sei halo mós formasaun ida kle’an kona-ba administrasaun, jestaun eskolár, jestaun finanseira nomós sei ko’alia kona-ba lejislasaun sira inerente iha área edukasaun no teknolojia informasaun no komunikasaun, nune’e sira bele sai dirijente eskola ne’ebé ho kualidade,” Ministra Edukasaun, Dulce de Jesus Soares, hateten, iha Vila-Verde, kuarta ne’e.
Notísia relevante : ME fasilita formasaun ba superintendente no inspetór eskolár hamutuk 108
Nia dehan, direjente sira presiza tuir formasaun tanba sira mak tenke implementa serbisu hotu.
“Mezmu ita iha kurríkulu di’ak, iha livru ne’ebé mak di’ak, ita iha polítika ne’ebé di’ak, maibé xave mak dirijente eskola sira, tanba sira mak tenke implementa serbisu sira ne’e hotu liuhusi apoiu edukasaun iha nível nasionál no munisipál,” Ministra akresenta.
Nune’e, formasaun ne’e ME hahú ona husi munisípiu Aileu hanesan mós pilotajen ida atu haree husi konteúdu formasaun nomós sei envolve diretór eskola sira ne’ebé mak iha ona esperiénsia hodi jere eskola ho di’ak no sira ne’e rasik mak sei fó formasaun ba diretór eskola sira.
Biban ne’e, Ministra Edukasaun husu ba dirijente eskola sira tenke sai ema ne’ebé iha responsabilidade tomak atu jere eskola no tenke sai ajente ba transformasaun edukasaun iha komunidade rasik hodi sai ema inovativu, hanoin krítiku, no analítiku hodi bele ajuda estudante sira.
Formasaun ne’e partisipa husi Diretór Eskola, Adjuntu Diretór, Koordenadór Eskola Filiál sira.
Jornalista : Osória Marques
Editora : Julia Chatarina
