Ministru husu jerente UNTL tau atensaun ba estudante nia preokupasaun
DILI, 25 setembru 2024 (TATOLI)—Ministru Ensinu Superior Siénsia no Kultura, José Honório da Costa Pereira Jerónimo, husu ba jerente sira iha Universidade Nasionál Timor-Lorosa’e (UNTL) atu tau atensaun ba estudante sira-nia preokupasaun tanba kada tinan Governu sempre aloka osan ba universidade ne’e.
“Tuir loloos reitór ho nia estrutura tenke haree ba asuntu ida-ne’e, reitór iha kompeténsia tomak mak atu haree ida-ne’e, Governu tinan-tinan atribui orsamentu ba UNTL, nune’e tenke haree. Reitór tenke tau ema ne’ebé iha kompete atubele haree sasán sira-ne’e, mais ha’u hanoin sira iha Diresaun Lojistika bele tau matan, ha’u seidauk tun direita maibé ha’u sei fó hatene ba reitór atu haree ba asuntu sira-ne’e, ne’e urjente tebes atu rezolve,” Ministru hato’o iha resintu Palásiu Governu, kuarta ne’e.
Notísia relevante : AAE-UNTL kestiona problema tolu ne’ebé estudante enfrenta
Governante ne’e akompaña preokupasaun husi estudante sira nune’e husu ba estutura tomak atu rezolve.
“Ha’u sei haruka Reitór Universidade Nasionál Timor-Lorosa’e atu rezolve problema ne’ebé estudante sira kestiona. Presiza tau matan ba asuntu ne’e,” Ministru akresenta.
Antes ne’e, Asosiasaun Akadémika Estudantíl husi Universidade Nasionál Timor-Lorosa’e (AAE-UNTL) liuhusi konferénsia imprensa, kestiona problema tolu ne’ebé estudante enfrenta hanesan infraestrutura, jestaun finanseiru no estrutura universidade.
Ba asuntu ne’e, Agência Tatoli seidauk hetan konfirmasaun ruma husi Reitór UNTL, João Martins inklui estutura universidade.
Governu aloka $18.649.005 ba UNTL iha tinan 2023, ne’ebé osan ne’e faheba programa prioridade tolu hanesan programa boa governasaun no jestaun institusionál $11.170.615, edukasaun no formasaun $7.461.650 no apoiu programa igualdade jéneru no inkluzaun sosiál $16.740.
Programa boa governasaun no jestaun institusionál iha sub-programa rua no atividade hamutuk 13, nune’e mós programa edukasaun no formasaun iha sub-programa hamutuk 14 inklui atividade 33, ne’ebé mak sei realiza iha 2023 no ikus liu programa igualdade jéneru no inkluzaun sosiál rasik iha sub programa ho atividade rua.
Jornalista : Osória Marques
Editora : Julia Chatarina
