DILI, 25 setembru 2024 (TATOLI)—Prezidente komisaun C trata asuntu Finansa Públika iha Parlamentu Nasionál (PN), Cedelízia Faria dos Santos, hateten Komisaun C to’o agora seidauk simu relatóriu ezekusaun orsamentu ba preparasaun sira hotu hodi simu vizita Amu Papa Francisco nian mai Timor-Leste foin lalais.
Nia husu ba Govenrnu liuliu komisaun organizadora ba eventu ida-ne’e, atu iha tempu badak bele hato’o ona relatóriu ezekusaun ba orsamentun millaun $12 ne’e ba Komisaun C iha Parlamentu Nasionál.
“To’o agora komisaun seidauk simu relatóriu husi Governu. Maibé, tuir informasaun ne’ebé ami simu katak ezekusaun ne’e la to’o millaun $12, posível iha de’it millaun $10-resin no restu ne’e sei fó fila-fali mai. Hanoin, sira sei halo relatóriu kompletu no sei entrega mai komisaun C no Parlamentu Nasionál,” Nia hateten hodi hatán ba Ajénsia TATOLI iha resintu Parlamentu Nasionál, kuarta ne’e.
Antes ne’e, iha 28 fevereiru 2024, Governu liuhusi reuniaun Konsellu Ministru (KM) delibera atu autoriza despeza to’o montante millaun $12 hodi gasta ba vizita Santu Padre Papa Francisco iha tinan 2024. Montante ne’e, Governu foti husi fundu kontinjénsia ba komisaun altu nível instituisionál ba vizita Sua Santidade hodi organiza atividade preparasaun ba vizita ne’e.
Deputadu Cedelísia Faria dos Santos dehan, tuir informasaun ne’ebé komisaun simu katak ezekusaun ne’e la to’o millaun $12 maibé iha de’it millaun $10-resin.
“Hanoin ezekusaun ne’e ita haree ho matan duni, tanba ita lori ita-nia sarani husi munisípiu 13 mai konsentra iha fatin konsentrasaun ne’e tenke han, ita garante sira-nia saúde, seguransa la’o ho di’ak. Sidadaun sira husi Indonézia mai tanba ita mak haree sira-nia hahán, aloka karreta, kria fatin barak, nune’e ezekusaun ne’e ita haree hela,” nia dehan.
Nune’e, tuir komisaun nia haree ba akompaña ezekusaun orsamentu preparasaun simu vizita Amu Papa la’o ho di’ak mezmu seidauk simu relatóriu detallu kona-ba gastu orsamentu sira husi Governu rasik.
Nune’e, nia hateten, iha parte ida hanesan kultura simu baniaka halo preparasaun di’ak no parte seluk kona-ba ezekusaun orsamentu bele klarifika ho gastu sira-ne’ebé bele haree ho matan, mezmu seidauk simu relatóriu loloos.
Momentu ne’eba mós komisaun ba halo fiskalizasaun bainhira sarani sira mai destaka iha kada fatin konsentrasaun husi munisípiu sira konsentra ba ne’e.
“Momentu ami ba halo duni fiskalizasaun, ita-nia sarani sira mai toba iha ne’eba. Ba iha Ataúro, sira simu hahan nasikotak iha kalan ne’e. Ami ba mós haree ho matan husi munisípiu Ermera, Manufahi sira simu hahán ema distribui duni,” nia dehan.
Maibé, nia dehan, iha lamentasaun balun kona-ba sarani sira preokupa ho hahán husi munisípiu balun mezmu alokasaun orsamentu boot, hanoin ne’e presiza investigasaun kle’an liután karik munisípiu seluk ne’ebé komisaun la to’o hala’o fiskalizasaun.
Notísia Relevante: Governu autoriza despeza to’o millaun $12 ba preparasaun vizita Papa Francisco
Jornalista : Nelson de Sousa
Editór : Cancio Ximenes
