DILI, 26 setembru 2024 (TATOLI)–Universidade Nasionál Timor-Lorosa’e (UNTL) aloka ona orsamentu hamutuk $80.000 hodi halo manutensaun infraestrutura iha fakuldade Ekonomia no Jestaun.
“Kona-ba moderniza ba auditóriu fakuldade Ekonomia no Jestaun no halo manutensaun ba saladeaula tolu, empreza Neltifer mak sai hanesan manan-na’in ba renovasaun ne’e, nune’e ita fó ona serbisu ba sira, tanba ne’e daudaun sira hahú halo ona serbisu tuir tempu kontratu ne’ebé iha. Durasaun kontrusaun fulan-tolu, hahú setembru no espera katak tinan ne’e nia rohan bele finaliza,” Pro-Reitór ba Asuntu Dezenvolvimentu Instituisionál iha UNTL, Lelis Gonzaga Fraga, hato’o iha ninia knaar fatin, UNTL, kinta ne’e.
Notísia relevante : AAE-UNTL kestiona problema tolu ne’ebé estudante enfrenta
Saladeaula tolu ne’e iha futuru sei utiliza ba kursu mestradu sira no nia modelu sai hanesan auditóriu ida-ne’ebé kompleta ho projetór no ba online.
Diretór empreza Neltifer, Nelson Fatima Doutel Ferreira, informa, projetu referidu bazeia ba kontratu husi UNTL atu halo modernizasaun ba auditóriu no halo reabilitasaun ba saladeaula tolu.
“Projetu ida-ne’e ami hetan husi UNTL hanesan na’in ba projetu atu halo modernizasaun, aleinde ne’e mós iha reabilitasaun ba saladeaula tolu tuir dezeñu husi UNTL,” nia tenik.
Jornalista : Osória Marques
Editora : Julia Chatarina
