COVALIMA, 26 Setembru 2024 (TATOLI) – Ministériu Interiór, liuhusi Diresaun-Jerál Servisu Migrasaun divulga Lei númeru 10/2021, primeira alterasaun lei númeru 11/2017, loron 24 Maiu, kona-ba Lei Migrasaun no Azilu ba autoridade sira iha munisípiu Covalima.
Diretór-Jerál Servisu Migrasaun, Inspetora-xefe Polísia, Adelaide da Rosa, hateten atividade ne’e parte ida atu hasa’e autoridade sira-nia koñesimentu oinsá atu identifika sidadaun estranjeiru sira tama iha Timor-Leste.
“Atividade sensibilizasaun lei ita foku ba munisípiu ne’ebé viziñu ho Indonézia, tanba sidadaun sira halo movimentu liuhusi fronteira no presiza identifika sira viola lei ka la’e? Ha’u hatene autoridade balun seidauk iha koñesimentu oinsá atu identifika vistu sidadaun [estranjeiru] sira mai atu halo saida?”, Inspetora-xefe hato’o, ohin.
Nia dehan ema estranjeiru ne’ebé mai serbisu iha Timor-Leste tenke uza vistu traballu, tanba lei la permite sira uza vistu turista atu serbisu iha país, maibé presiza liuhusi prosesu, la signifika atu hamenus sidadaun estranjeiru mai iha Timór.
Adelaide da Rosa alerta ba autoridade atu kolobora no informa bainhira hasoru ema estranjeiru sira ne’ebé tama no iha indikasaun ba violasaun vistu nian ba pesoál migrasaun ka ba Polísia Nasionál Timor-Leste (PNTL), nune’e bele tau-matan ba sidadaun estranjeiru sira, inklui timoroan ne’ebé tulun estranjeiru mai iha país.
Prezidente Interinu Autoridade Covalima, Alberto Moniz de Araújo, dehan Covalima nia área hetan kontrolu husi autoridade no sidadaun estranjeiru ruma atu tama presiza iha dokumentu hanesan pasaporte.
“Ita-nia postu entrada la’ós iha Salele de’it, maibé iha mós postu administrativu sira hanesan Fatululik, Fatumea no Tilomar. Presiza atu fó atensaun másima, tanba dalaruma komunidade hala’o atividade komersiál iha fronteira hodi sustenta sira-nia família”, nia fó hanoin.
Komandante PNTL Covalima, Superintendente Polísia Calisto Gonzaga, reforsa katak Estadu forma serguransa migrasaun atu kontrola sidadaun ne’ebé tama-sai liuhusi fronteira terrestre, iha postu administrativu sira nomós iha aeroportu.
“Ita presiza atu kontrola sidadaun sira tama-sai. Bainhira sidadaun estranjeiru tama, nia presiza iha dokumentu ofisiál hanesan pasaporte no vistu nu’udar saida. Ita presiza iha koñesimentu ne’ebé kle’an”, nia dehan.
Tanba ne’e, populasaun sira presiza hatene, tanba sidadaun estranjeiru sira bainhira tama uza vistu vistu turista labele hala’o atividade negósiu hodi fa’an asesóriu ba timoroan sira, maibé mai vizita de’it.
Nune’e, husi Migrasaun mak halo esplikasaun ho detalla liu, tanba atu kontrola sidadaun estranjeiru la’ós husi PNTL no Migrasaun de’it, maibé inklui mós lidér lokál sira iha munisípiu, nune’e bele preves kazu sira.
Notísia relevante: MI sosializa lei migrasaun no azilu iha Bobonaro
Jornalista: Celestina Teles
Editora: Maria Auxiliadora
