COVALIMA, 26 Setembru 2024 (TATOLI) – Servisu Saúde Munisípiu Covalima ne’e lansa, ohin, vasina kontra vírus papiloma umanu (HPV, sigla inglés) iha Eskola Bázika Setrál (EBC) Ogues, iha postu administrativu Maucatar, munisípiu Covalima.
Hafoin lansamentu vasina, Diretór Servisu Saúde Covalima, Domingos Sequiera, dehan ida-ne’e atu hasa’e imunidade ba estudante feto sira ho idade entre 11 no 14 hodi prevene kankru kolu úteru.
“Ita lansa ona vasina HPV, nune’e aban ba oin hahú ona vasina ba estudante feto sira iha postu saúde sira, tanba molok atu halo vasina, saúde halo uluk advokasia iha nivel munisípiu no postu hodi fahe informasaun ba profesór sira, nune’e fó garante katak vasina HVP atu hasa’e estudante feto sira-nia imunidade”, Domingos Sequiera salienta iha EBC Ogues, ohin.
Lembra katak lansamentu ba vasina HPV halo ona iha loron 23 Setembru, maibé tanba iha kestaun téknika mak realiza fali iha 26 Setembru no sei remata iha 18 Outubru ne’e.
Dadus estudante ho idade 11-14 ne’ebé sei simu vasina HPV hamutuk 3.708, husi númeru ne’e estudante feto na’in-71 simu ona vasina iha EBC Ogues no labarik ne’ebé la eskola ne’ebé atu simu vasina ne’e hamutuk 162 husi postu administrativu Fatululik, Fatumea, Fohorem, Tilomar, Maucatar, Suai no Zumalai.
Superintendente Servisu Edukasaun Covalima, Jacinto do Carmo, ne’ebé partisipa iha atividade ne’e dehan programa imunizasaun ne’e hodi hasa’e imunidade estudante feto sira atu prevene moras.
Lembra katak iha 19 Jullu 2024, Governu hamutuk ho parseiru sira hanesan Organizasaun Mundiál Saúde, Fundu Nasaun Unida ba Labarik, Australian Aid, Aliansa Vasina, lansa ona vasina HPV iha Timor-Leste.
Vasinasaun HPV mak imunizasaun atu proteje isin-lolon husi infesaun HPV. Vasina ida-ne’e fó benefísiu atu evita kankru iha área seksu no órgaun reprodusaun hanesan kankru kolu uteru no kankru pénis (mane nia moen).
HPV nu’udar vírus ne’ebé kauza husi pele genital (área seksu) no kankru iha órgaun seksu, hanesan kankru kolu úteru, vulva, vajina, pénis no ánus (fatin soe bee-boot). Vírus ida-ne’e bele da’et liuhusi kontaktu direta ho kulit husi sofre-na’in sira ka vítima ba moras referida, espesialmente bainhira halo relasaun seksuál.
HPV mós bele kauza ba tipu moras kankru iha parte garganta nia kotuk, nanál nia hun no amandél ka anjiñas.
Vasinasaun HPV hanesan programa obrigatóriu Governu nian. Vasina HPV fó ba labarik feto sira ne’ebé atu tama ba idade adolesénsia. Vasina ne’e mós bele fó ba adultu sira-ne’ebé seidauk ka nunka simu vasina ne’e kompletu.
Vasinasaun HPV sei la’o di’ak bainhira fó antes ema-ne’e hetan infesaun HPV, mak bainhira sei labarik no seidauk ativu halo relasaun seksuál.
Tanba ne’e, vasina ne’e ideál liu fó ba labarik ho idade 11-14. Ba labarik sira, vasina HPV presiza fó mais ou menus dala-rua ho durasaun tempu deskansa ne’e to’o fulan neen to’o 12.
Notísia relevante: Covalima hein desizaun husi MS hodi lansa vasina HVP ba estudante sira
Jornalista: Celestina Teles
Editora: Maria Auxiliadora
