UNTL prepara finalista 2.173 hodi gradua faze daruak iha dezembru
DILI, 26 setembru 2024 (TATOLI)—Universidade Nasionál Timor-Lorosa’e (UNTL) prepara ona finalista hamutuk 2.173 hodi gradua ba faze daruak iha dezembru tinan ne’e.
“Ita seidauk deside data tanba sei hein prosesu aprovizionamentu ba atributu graduasaun nian. Ida-ne’e mak ita-nia preparasaun iha parte atributu. Estudante hamutuk 2.173 mak sei gradua,” Vise-Reitór ba Asuntu Akadémiku no Garantia Kualidade iha UNTL, Samuel Venâncio Freitas, hateten, iha ninia knaar fatin, kinta ne’e.
Nia dehan, normalmente atributu laiha maibé kalendáriu akadémiku iha nune’e graduasaun labele la’o tanba estudante tenke uza atributu mak foin bele gradua.
“Ita depende ba atributu ne’ebé iha. Ita la’ós hanesan universidade privadu sira ne’ebé osan iha ita sosa direita, entaun ita sempre halo prosesu aprovizionamentu. Normalmente atributu laiha maibé kalendáriu akadémiku iha mós graduasaun labele la’o tanba estudante tenke uza atributu foin bele simu graduasaun,” nia akresenta.
Parte universidade sei halo diskusaun kona-ba fatin graduasaun ne’ebé ho espasu luan nune’e bele akumula estudante sira hotu tanba graduasaun faze dahuluk ne’e estudante barak maibé iha fatin kloot entaun ladún konfortável.
“Estudante ne’ebé naran iha ona lista graduasaun presiza mai halo verifikasaun no konfirma katak sei gradua duni iha dezembru ne’e. Ida-ne’e presiza halo verifikasaun tanba ita sei hatama tan lista ba iha Ministériu Ensinu Superiór Siénsia no Kultura (MESSK) ba fulan-ida, tanba sira mós tenke verifika didi’ak molok ita halo graduasaun,” Vise-Reitór tenik.
Notísia relevante : Estudante UNTL 1.728 simu graduasaun
Graduasaun kada tinan realiza dala-rua tanba UNTL kada tinan simu estudante barak.
“Ita gradua 2.000-resin liubá no 2.000-resin mai tan, ita konta gradua 4.000-resin. Signifika ne’e di’ak ona pur anu, tinan-ida mak ita gradua hanesan ne’e di’ak liu, tanba kada tinan ita simu alunu ne’e 3.000 to’o 4.000, depois tinan-ida ita hasai 4.000 signifika tama-sai mós hanesan, ida-ne’e mak sei rezolve buat klaran ne’e. Tanba bainhira ema tama barak maibé ita gradua oituan ne’e ema sempre kestiona,” nia dehan.
Vise-Reitór konsidera, kada tinan mak gradua barak nia kualidade ne’e iha pozitivu no negativu, gradua menus ema kestiona, gradua barak mós ema kestiona.
“Kona-ba kualidade depende ema mak fó feedback mai ita, maibé kuandu iha ona faze graduasaun ne’e nia iha kualidade tanba nia hakat liu ona prosesu lubuk,” Samuel Venâncio, hato’o.
Diretór Nasionál Atendimentu Estudante, Rui Loco Pires, hateten, lista finalista sei aprezenta ba superiór sira atubele halo preparasaun nune’e ita bele realiza graduasaun tuir kalendáriu akadémika nian.
Totál finalista ne’ebé atu gradua hamutuk 2.173, kompostu husi fakuldade Agricultura 172, fakuldade Engeñaria Siénsia no Teknolojia 202, fakuldade Educação Arte no Uumanidade 519, fakuldade Medisina no Siéncia Saúde 648, fakuldade Ekonomia no Jestaun 210, fakuldade Direitu 34, fakuldade Siénsia Sosiál 268, fakuldade Filosofia Siénsia Umana 98 no fakuldade Turizmu Arte Indústria Kreativa no Kulturál 22.
Jornalista : Osória Marques
Editora : Julia Chatarina
