Ekipa saúde husi Singapura sei halo tratamentu nehan-tilun iha Maliana

BOBONARO, 27 setembru 2024 (TATOLI) – Ekipa saúde husi Singapura hamutuk na’in-17, hahú loron 30 fulan setembru to’o loron 04 fulan-outubru tinan 2024 ne’e sei halo konsultasaun gratuita iha Hospital Referál Maliana (HRM) ba komunidade ne’ebé enfrenta problema nehan no tilun.

Diretór Ezekutivu HRM, José Marçal da Cruz, esplika, programa ne’e realiza liu husi kooperasaun entre Institutu Nasionál Saúde Públika Timor-Leste (INSPTL), Ministériu Saúde no ekipa saúde Singapura.

Notísia relevante: PNUD entrega mákina insineradór lixu ba MS iha Maliana

“Ita-nia parseiru husi Singapura ne’e tinan-tinan sira mai, entaun iha 2024 ne’e iha 30 setembru to’o 04 outubru 2024, sira-nia objetivu mai iha ne’e atu fó treinamentu ba profisionál saúde no fó tratamentu nehan ho tilun ba ita-nia pasiente, tanba ne’e husu ba komunidade atu hakbesik-an mai ospitál,” nia informa ba TATOLI, iha Maliana, sesta ne’e.

Nia dehan, durante loron haat iha ekipa médiku husi Singapura sei apoia ekipamentu médiku no ai-moruk.

“Ekipamentu médiku ho ai-moruk ne’e ita halo ona karta ba Autoridade Aduaneira, Ministériu Finansa ho livre husi taxa,btanba sira mai servisu no apoia voluntariamente,” nia esplika.

Ezekutivu HRM ne’e dehan, ekipa médiku hirak-ne’e sei apoia formasaun ba profeiional saúde sira iha programa Basic Cardiard Life Suport ne’ebé mak relasaun ho fuan, jestaun ospitalár, jestaun emerjénsia, jestaun enfermeiru atu atende pasiente iha Intensive Card Unit (ICU).

Alende ne’e sei fó treinamentu mós kona-ba programa tilun no nehan, konsulta inan isin-rua ho mákina ultrasound, treinamentu ba parteira sira atu halo atendimentu ba inan isin-rua ho kualidade.

Profisionál saúde sira-ne’ebé sei partisipa iha formasaun ne’e mai husi Hospital Referál Maliana rasik kompostu husi médiku, enfermeiru, parteira no profisionál saúde husi sentru saúde no postu saúde sira-ne’ebé iha munisípiu Bobonaro.

Alende ne’e HRM mos konvida médiku no enfermeiru ida husi Hospital Nasionál Guido Valadares (HNGV), Ospitál Referál Maubesi mediku ida no enfermeiru ida.

Nune’e mós númeru husi Hospital Referál RAEOA, Suai no envolve membru Polísia Nasionál Timor-Leste (PNTL) munisípiu Bobonaro no Bombeiros.

“Formasaun ne’e importante tanba ezemplu haree ba fuan, rins no korasaun. Ida-ne’e ita seidauk to’o entaun ita sei presiza tán husi ajénsia saúde sira mai partisipa atu hasa’e koñesementu profisionál saúde sira,” nia katak.

Enkuantu oráriu tratamentu ba nehan no tilun sei la’o tuir oras atendimentu ne’ebé la’o hanesan bainbain iha Ospitál Referál Maliana.

Notísia relevante: MS inaugura infraestrutura saúde neen iha Bobonaro

Jornalista: Sérgio da Cruz

Editór: Evaristo Soares Martins