DILI, 27 Setembru (TATOLI)–Governu liuhusi Servisu Protesaun Sívil Munisípál no Jestaun Risku Dezastre Naturál iha Baucau, fó ona apoiu nesesidade bázika ba vitima inséndiu uma-lisan 12 iha aldeia Maucale, suku Gariuai, postu Administrativu Baucau Vila, munisipiu Baucau.
Notísia Relevante: Inséndiu estraga uma-lisan 12 iha Gariuai
“Governu fó ona apoiu nesesidade ba ami vítima inséndiu sira mak hanesan foos, supermie, mina Bimoli, doxe lata, biscuit, sabun no materiál dapur nian inklui lona husi Autoridade Protesaun Sivil munisipál,” Vítima, Juvencio Belo Guterres, hateten ba Agência Tatoli, sesta ne’e.
Vitima ne’e mós hateten, ekipa konjunta husi parte Governu hanesan Polísia Nasionál Timor-Leste no Cruz Vermelha Timor-Leste mós tun ona direta ba terrenu hodi halo levantamentu dadus ba inséndiu ne’e.
Iha sorin seluk, Xefe suku Gariuai, Arlindo Belo Freitas, relata Autoridade Protesaun Sivil Munisípiu Baucau fó apoiu diretamente ba vítima inséndiu uma-lisan 12 iha aldeia Maucale, suku Gariuai.
“Iha kalan ne kedan, Governu liuhusi protesaun sívil fó apoiu ba vítima sira. No, iha dadeersan ne’e kedas, sira halo kedas levantamentu dadus no halo identifikasaun ba uma 12 ne’ebé ahi han ne’e,” Xefe suku Gariuai, Arlindo Belo Freitas, hateten ba Agência Tatoli liuhusi telefónika,
Autoridade lokál ne’e hateten, APC halo ona levantamentu ba iha uma adat sira-ne’ebé ahi han, maibé seidauk hatene apoiu tuir mai kona-ba apoiu rekuperasaun atu konstrui fila-fali uma-lisan ne’e, nia parte seidauk hatene.
“Apoiu Emerjénsia hanesan nesesidade bázika ne’e vítima sira hetan ona. Maibe, ba konstrusaun uma-lisanne’e, APC sei relata ba minstériu kompetente liuliu Sekretáriu Estadu Arte no Kultura mak sei haree ba iha prosesu ne’e,” nia dehan.
Jornalista : Jesuína Xavier
Editór : Cancio Ximenes
