DKSN Viqueque hahú emite ona sertidaun moris no BI orijinál

VIQUEQUE, 28 setembru 2024 (TATOLI)—Diresaun Konservatóriu Servisu Notariadu (DKSN) munisípiu Viqueque hahú emite fali ona sertidaun moris no Bilhete de Identidade (BI) orijinál tanba iha ona blanku.

Diretór Konservatóriu Servisu Notariadu munisípiu Viqueque, Rogério da Costa, relata, durante ne’e blanku orijinál hotu, nune’e ofisiál sira print dokumentu sertidaun moris no BI provizóriu ho surat-tahan hodi distribui ba abitante ne’ebé mai trata dokumentu.

“Foin lalais loron 13 setembru ne’e ami simu fali ona blanku orijnál sertidaun moris hamutuk 3.000 no blanku BI orijinál 1.000, ne’ebé kada loron ami emite fali ona ba komunidade ne’ebé mai tratata sira-nia dokumentu,” Diretór hateten ba Agência Tatoli, iha postu Viqueque Vila, sábadu ne’e.

Notísia relevante : Blanku BI no sertidaun iha Servisu Rejistu no Notariadu Viqueque hotu ona

Ofisiál DKSN fó ona antendimentu ba sidadaun ne’ebé trata sertidaun moris hamutuk 1.000-resin no blanku orijinál 2.000, ne’ebé husi númeru ne’e konsege emite ona blanku BI 600 no blanku ne’ebé seidauk emite
400.

“Ha’u sente blanku orijinál ne’e semana ida tan stock bele hotu. Maibé, antes blanku sira-ne’e hotu, ami hato’o ba nasionál hodi distribui blanku orinjinál mai munisípiu Viqueque hodi emite ba ita-nia komunidade,” nia akresenta.

Ofisiál sira kontinua print sertidaun moris iha surat-tahan, maka foin emite fali orijinál atu labele estraga blanku orijinál.

“Ba sidadaun sira-ne’ebé presiza urjente hanesan ba eskola no trata konta banku, entaun ami fó orijinál, maibé la’ós urjente, entaun ami fó uluk provizóriu ba sira, atu sira halo verifika loos tiha sira-nia dokumentu hafoin ita fó orijnál,” nia tenik.

Biban ne’e Diretór husu ba sidadaun ne’ebé durante ne’e simu dokumentu hanesan sertidaun moris no BI provizóriu iha sarat-tahan, bele hakat mai edifísiu DKSN hodi simu filafali dokumentu orijinál.

“Hakarak informa ba sidadaun sira katak daudaun ne’e ita iha fali ona blanku, ne’ebé ba hirak ne’ebé maka kaer blanku surat-tahan mutin karik bele mai troka hodi simu fali blanku orijinál,” nia hato’o.

Funsionáriun DKSN daudaun ne’e iha na’in-11, ne’ebé hahú segunda to’o sesta fó atendimentu ba komunidade iha Viqueque.

Jornalista     : Vitorino Lopes da Costa
Editora          : Julia Chatarina