VIQUEQUE, 07 agustu 2024 (TATOLI)-Diretór Servisu Rejistu no Notariadu munisípiu Viqueque, Rogério da Costa, informa, Servisu Rejistu Notariadu Viqueque blanku ba Billeti Identidade (BI) no sertidaun nasimentu esgotadu ka hotu ona tanba ne’e distribui de’it surat-tahan mutin ba komunidade sira.
“Estoke blanku ba BI no sertidaun nasimentu ne’e hotu iha fulan-outubru 2023 to’o agora fulan-agostu 2024. Nune’e, loro-loron ami halo atendementu komunidade sira, BI no Sertidaun Nasimentu ne’e, ami imprime ho surat-tahan mutin ba fó ba ita-nia komunidade sira. Ami mós esplika ba sira katak maske surat-tahan mutin, maibé dokumentu sira-ne’ebé ami fó ne’e válidu bele uza provizóriu,” Rogério da Costa, hateten ba Agência TATOLI, iha ninia knaar fatin, Beloi, kuarta ne’e.
Rogério dehan, Servisu Rejistu Notariadu Viqueque halo ona pedidu ba nasionál no bainhira iha bele distribui mai Viqueque.
“Ami mós fó-hatene ona ba ita-nia komunidade sira-ne’ebé simu dokumentu surat-tahan mutin bainhira estoke iha fali maka ita-nia komunidade sira troka hodi simu fali orijinál,” nia hato’o.
Kona-ba atendementu, Diretór ne’e dehan, agora daudaun atendementu la’o normál ema dudu malu mós laiha tanba komunidade sira mai trata sira-nia dokumentu, Servisu Rejistu Notariadu fahe loron; hahú segunda to’o tersa, atendementu ba sertidaun moris no sertidaun kazamentu, loron kuarta halo renovasaun, loron kinta to’o atendementu rejistu kriminál.
Nune’e atendementu kada loron ida atende ema na’in-40, fulan ida Servisu Rejistu Notariadu sempre halo atendementu ba komunidade sira kuaze-397.
“Iha atendementu ne’e ema difisiente, inan isin-rua no idade avansadu mai ami bolu atendementu, maibé ba foin-sa’e sira maka simu númeru tanba ami limitadu rekursu umanu nune’e loron ida fó atendementu ba ema na’in-40,” nia relata.
Dezafiu, ezekutivu ne’e dehan, durante ne’e Servisu Rejistu Notariadu munisípiu Viqueque hasoru maka menus rekursu no fasilidade hanesan makina imprime.
“Mai uluk fusionáriu hamutuk na’in-ualu, maibé foin lalais na’in-ida ba fali nasionál, entaun agora funsionáriu hela na’in-hitu mak fó atendementu ba komunidade sira. Ami presiza aumenta fusionáriu na’in-haat, maibé depende ba Governu. Kona-ba ekipamentu ne’ebé ne’e printer (impresora) ba BI, preokupasaun sira-ne’e ha’u hato’o ona ba nasionál, maibé seidauk fó resposta,” nia haktuir.
Tuir dadús sertidaun nasimentu fulan-janeiru to’o fulan-juñu 2024 Rejistu Notariadu Viqueque konsege prodús 2.203 no Billeti Identidade (BI) konsege prodús 4.386.
Jornalista:Vitorino Lopes da Costa
Editór : Rafael Ximenes de A. Belo
