DILI, 28 setembru 2024 (TATOLI)–Universidade Orientál Timor-Lorosa’e (UNITAL), sábadu ne’e hala’o serimónia graduasaun ba dala-XIV, ba finalista hamutuk 240, iha nível lisensiatura, baxarelatu no mestradu.
Reitór UNITAL, Claudino Ninas Nabais, husu ba graduadu sira atu kompete ho finalista husi universidade sira seluk iha kampu traballu.
“Graduadu sira uza siénsia ida-ne’ebé imi hetan iha UNITAL hodi lori bá dezenvolve imi-nia an no família, utiliza ba kompetisaun iha kampu traballu ne’ebé bele kompete. Labele sente katak tanba husi UNITAL, entaun moe no tauk, labele sente katak la hanesan ho graduadu husi universidade sira seluk, konsidera kbiit iha fiar nafatin ba imi-nia an, katak siénsia iha ne’ebé de’it iha universidade ne’ebé de’it hanesan de’it, fiar imi-nia an lori siénsia ida-ne’e ba kompete iha saida de’it ne’ebé apropriadu ba imi atu kompete,” Reitór UNITAL, hato’o iha ámbitu serimónia iha salaun UNITAL, Becora, sábadu ne’e.
Nia konsidera, siénsia ne’ebé estudante sira hetan durante tinan-lima nia laran la to’o de’it ba ida-ne’e, tanba apreende siénsia ne’e nunka para, la haree ba idade no kondisaun, importante mak esforsu hodi aumenta nafatin kapasidade.
“Entaun, ohin ne’e sira kompleta ona sira-nia devér, ohin sira simu sira-nia direitu, sira hetan títulu ne’ebé durante ne’e sira esforsu iha tinan hirak nia laran, ha’u espera katak sira sente orgullu ba matenek ne’ebé sira hetan,” nia akresenta.
Reitór esklarese, UNITAL nu’udár instituisaun akadémiku ida prontu nafatin atu koopera ho graduadu sira atu fahe informasaun maski sai ona antigu alunu iha universidade ne’e. Universidade privada ne’e iha responbilidade atu haree graduadu sira nafatin, antigu alunu mós iha asosiaun, entaun bainhira iha informasaun ligadu ho atividade saida de’it bele envolve antigu alunu sira.
Notísia relevante : Estudante UNITAL husu MESSK tau atensaun ba reitór nia grau akadémiku
Iha biban hanesan, Diretór Nasionál Ministériu Ensinu Superior Siénsia no Kultura (MESSK), Higino Alves, parabeniza graduadu sira no husu atu hatudu matenek ne’ebé durante ne’e hetan iha universidade hodi kompete no serbisu iha sosiedade hodi kontribui ba dezenvolvimentu iha Timor-Leste.
“Parabéns ba graduandu sira tanba loron ida ohin loron ne’e espesiál tebes, imi sakrifísiu no luta hasoru dosente balun ne’ebé oin la midar, maibé imi tenta to’o ohin loron bele taka ona xapeo metan. Agradese ba sivita akadémika sira hotu ne’ebé lori ona graduadu sira-ne’e taka ona xapeo metan iha loron ohin,” nia tenik.
Nia fó hanoin: “Graduandu sira imi-nia futuru sei naruk, la’ós ohin mak termina ona maibé husi ohin ba oin ba ona moris iha sosiedade nia le’et no hatudu ba sira saida mak imi apreende no hetan durante iha imi-nia estudu hodi kontribui ba dezenvolvimentu iha Timor-Leste.”
Diretór afirma, MESSK nafatin iha kompromisu atu suporta ensinu superiór sira hotu iha rai-laran tantu públiku no privadu, liuhusi subvensaun públika tanba atubele ajuda kada universidade sira hodi sira bele hadi’a no hasa’e liután kualidade.
Graduadu, Agostinho Chega Jerónimo, husi fakuldade Engeñaria, sente orgullu tebes tanba bele finaliza ona nia estudu iha UNITAL maski hasoru dezafiu oin-oin.
“Loron ida ohin nu’udar loron espesiál mai ha’u tanba ha’u bele finaliza ona ha’u-nia estudu. Agradese tebes tanba hasoru dezafiu oin-oin durante tinan naruk maibé ikus mai bele ramata. Dezafiu ne’ebé ha’u hasoru iha ha’u-nia estudu mak fundu finansiamentu, tanba nu’udar ema ai-leba oan, maibé husi dezafiu ne’ebé mak ha’u hasoru, ha’u nunka rende, tanba ne’e mak ohin ha’u finaliza ona,” nia tenik.
Jornalista : Osória Marques
Editora : Julia Chatarina
