BOBONARO, 30 Setembru 2024 (TATOLI) – Komandante-Jerál Polísia Nasionál Timor-Leste (PNTL), Komisáriu Henrique da Costa, propoin ba Governu atu prioriza rekursu PNTL nian, liuliu ba Unidade Patrullamentu Fronteira (UPF) hodi reforsa kontrolu iha zona fronteirisa.
Tuir Henrique da Costa, vijilánsia iha fronteira nu’udar prioridade nasionál ida-ne’ebé aas liu, ne’ebé sai hanesan dezafiu ba unidade ida-ne’ebé ho karakterístika únika, tanba ne’e presiza servisu operasionál ne’ebé aas iha oras 24 nia laran, maibé dala barak iha kondisaun klimátika ne’ebé di’ak no kondisaun serbisu ne’ebé difísil tebes.
Nia lembra katak, durante tinan barak, importánsia UPF nian iha konstestu seguransa nasionál nian aumenta hodi hatudu papél fundamentál ne’ebé hala’o iha kontrolu fronteira durante eventu boot sira. Atividade operasionál unidade ne’e nian reflete iha kapturasaun oioin, ne’ebé hala’o husi UPF iha fronteira ne’ebé la autorizada no apreensaun oioin ne’ebé hala’o ona.
Komandante-Jerál ne’e dehan membru UPF hamutuk 330, maibé la sufisiente atu kobre fronteira rai maran. Tanba ne’e, mai ho nesesidade urjénsia ba rekrutamentu atu kompleta númeru ne’ebé planeia ona, tanba haree katak importánsia estratéjika husi fronteira, UPF hetan mós apoia husi Unidade Espesiál Polísia no komandu munisipíu sira atu kumpre misaun polísia nian.
Aleinde rekursu umanu, komisáriu ne’e mós sita kona-ba nesesidade urjente atu hadi’a kondisaun membru PNTL sira-nian, liuliu UPF ba manutensaun ka reparasaun edifísiu sira-ne’ebé eziste ka konstrusaun edifísiu foun, nune’e bele kontribui ba membru UPF nia moris di’ak no promove espirítu misaun nian.
“Maske nune’e, PNTL sempre iha kapasidade atu adapta difikuldade no dezafíu sira-ne’ebé hasoru, laiha dúvida atu konstrui UPF ba unidade estratéjiku ida-ne’ebé nia misaun sustenta ho ninia determinasaun forte atu asegura ba fatin PNTL nia misaun jerál, garante seguransa no protesaun ba ema no sasán sira, no kontribui ho forma ida-ne’ebé nesisidu no klaru ba dezenvolvimentu moris di’ak timoroan sira-nian, sempre ho perspetiva ba mudansa, esperansa, koezaun interna, konfiansa, maibé liuliu atu fó onra ba misaun sira-ne’ebé u kontribui ona ba iha área fronteira”, Komisáriu Henrique da Costa, hato’o iha nia diskursu iha ámbiru komemorasaun aniversáriu UPF ba-21, iha Mota-Ain, ho tema “Forte iha seguransa ho mamar hodi serví povu no nasaun RDTL”.
Henrique da Costa hameno ba membru UPF hotu, hahú husi ofisiál sira, sarjentu no ajente, atu kontinua garante seguransa iha fronteira ba rai ida-ne’e no ba komprimentu misaun sira-ne’ebé atribui ona ba sira.
Iha fatin hanesan, Sekretáriu Estadu Protesaun Sivíl, Domingos Mariano Reis, hateten dedikasaun no kontribuisaun husi UPF ba nasaun boot tebes no importante.
Tanba ne’e, nia husu atu mantein komunikasaun ho seguransa fronteira Indonézia nian atu garante estabilidade no armonia iha fronteira, tanba prezensa UPF iha fronteira fó konfiansa ba povu Timor-Leste katak sira mak lutu ba nasaun.
“Maibé ho rekursu ne’ebé limitadu la signifika katak nu’udar barreira ida ba ita-boot sira-nia misaun ,maibé nu’udar referénsia durante ita-bo’ot sira-nia misaun iha knaar loron-loron, ne’ebé depozita ona iha ita-boot sira-nia atividade diária”, dehan.
Tuir nia, PNTL nu’udar pilár daruak husi sistema seguransa nasionál, tanba ne’e Governu nafatin tau prioridade no aposta ba UPF iha Planu Estratéjiku Dezenvolvimentu (PED) 2011-2023 hodi asegura fronteira.
“Ha’u nudar segundu homem ba Ministériu Interiór, nafatin husu ba UPF atu mantein imparsialidade, onestidade, lealdade, umanidade, netru, firme no unidade serbisu iha ita-boot sira-nia misaun, bele fó konfiánsa ba ita-nia populasaun iha fronteira”, nia fó hanoin.
Notísia relevante: UPF la tolera sidadaun ne’ebé prátika atividade ilegál iha liña fronteira
Jornalista: Abílio Elo Nini
Editora: Maria Auxiliadora
