OÉ-CUSSE, 01 abríl 2024 (TATOLI) – Komandante Polísia Unidade Patrullamentu Fronteira (UPF), Superintendente Euclides Belo, fó-sai katak, Polísia Unidade Fronteira, sei la tolera sidadaun ida koko prátika atividade ilegál iha liña fronteira entre RAEOA ho munisípiu Belu no Timur Tengah Utara (TTU) inklui munisípiu Kupaun, Repúblika Indonézia.
Nia dehan, Oé-Cusse nu’udar rai enklave ne’ebé fronteira terrestre direita ho munisípiu tolu hosi nasaun Indonézia nian, nune’e ekipa sekreta UPF sei kontinua intensifika patrullamenu iha liña fronteira hodi kontrola movimentu ilegál sira.
Notísia relevante: DNTT sei halo inskrisaun ba motorizada ne’ebé seidauk iha dokumentu
“UPF sei la serbisu mesak, maibé serbisu koordenada ho komandu PNTL rejionál Oé-Cusse nian, ezemplu UPF prende (halo apreensaun) no kaptura laiha dokumentu, kategoria ilegál, ne’e nia paradeiru maka ami tenke halo auto-partisipasaun, kuandu na’in laiha, ami halo auto-entrega ba iha Ministériu Públiku hodi halo prosesu,” Euclides Belo, ba jornalista sira iha Oé-Cusse.
Nia dehan, presiza halo eedukasaun sívika ba autoridade lokál no komunidade sira, nune’e iha koñesimentu di’ak.
“Klaru katak edukasaun sívika ne’e importante, nune’e sidadaun hotu hatene, kompra sasán nia folin rihun ida ba leten tenke tuir dalan legál,” nia fó hanoin.
Notísia relevante: Governu apoia motorizada no televizaun ba postu UPF iha Oé-Cusse
Jornalista: Abílio Elo Nini
Editór: Evaristo Soares Martins