DILI, 30 setembru 2024 (TATOLI) – Vise Ministru Fortalesimentu Instituisionál Saúde, José dos Reis Magno, hateten Ministériu Saúde halo ona pagamentu balun ba ospitál tolu iha estranjeiru, hanesan Indonézia, Malázia no Singapura.
“Semana kotuk ami halo ona kontaktu ba ospitál tolu iha rai liur liu husi email hodi responde ba sira-nia preokupasaun ba dividas sira, entaun ba Siloam-Jakarta ami halo ona pagamentu balun, laos 100 % depois ami mós halo pagamentu balun ba ospitál iha Malázia, agora ospitál Singapura mak ami halo ezersísiu boot atu ohin ne’e ami tenke haree oinsá bele selu, entaun ida-ne’e mak ita sei selu hamutuk ospitál tolu kuaze millaun $7”, José dos Reis Magno ba jornalista sira iha Aeroportu Inetrnasionál Nicolau Lobato, ohin.
Nia husu ba jerente ospitál Indonézia, Malázia no Singapura atu nafatin mantein halo tratamentu ba pasiente sira ne’ebé mak iha ne’eba.
“Ha’u husu ba jerente ospitál sira hanesan tolu iha rai liur, husu atu nafatin mantein halo tratamentu ba ita-nia pasiente sira ne’ebé mak iha ne’eba. Husu ba sira atu simu nafatin ita-nia pasiente karik pasiente foun ruma atu ba tan”, nia afirma.
Nia esplika, atu responde kona-ba dividas iha ospitál estranjeiru mak osan millaun $7, husi Governu anteriór 2023 nian no restu seluk husi Governu ida-ne’e nian, entaun daudaun ne’e halo hela esforsu mak selu uluk balun ona tanba sira fó prestasaun kuidadu ba pasiente timoroan sira ne’ebé mak halo hela tratamentu iha ne’eba.
“Ita demora tanba halo verifikasaun depois hanoin katak ladún seguru, entaun agora iha prosesu reverifikasaun mak ita halo pagamentu balun ona no funsionáriu sira kontinua halo reverifikasaun ba seidauk selu (outstanding) ne’ebé mak iha, tanba Governu liuhusi Konsellu Ministru mós fó atensaun ba asuntu ida-ne’e ba ita atu haree hodi halo pagamentu no ami mós kria ekipa ida atu halo monitorizasaun frekuente ba divida sira ne’ebé mak iha”, nia konklui.
Notísia relevante : Ministériu Saúde esforsu atu selu dívida ospitál tolu iha estranjeiru
Jornalista : Felicidade Ximenes
Editór : Zezito Silva
