VIQUEQUE, 30 setembru 2024 (TATOLI)-Xefe suku Bahatata, postu administrativu Uatucarbau, munisípiu Viqueque, Patricio Mario Pinto, relata liuhosi projetu Planu Nasional Dezenvolvimentu Suku (PNDS), 2021-2022 nian, Konsellu Suku Batata deside harii pre-eskolár iha suku Bahatata tanba importante atu fasilita prosesu aprendijázen ba labarik sira.
“Durante ne’e edifísiu ba ita-nia oan sira pré-eskolár laiha ne’ebé ami oferese sede suku ba sira hodi uza hanorin ita-nia oan sira. Foin lalais ne’e maka ami enkontru konsellu suku hodi deside orsamentu PNDS ba suku Bahatata tinan 2021-2022 ne’ebé la implementa ne’e aloka ba konstrusaun edifísiu pré-eskolár,” nia hateten ba Agência Tatoli, iha postu Uatucarbau, ohin.
Nia dehan maske konsellu suku foin maka foti desizaun ne’e, maibé projetu PNDS ho montante orsamentu $31.000 hodi konstrui sala tolu inklui sala sanitária ida ne’e konstrui ona iha fulan-jullu 2024 liubá.
“Daudauk ne’e progesu fíziku konstrusaun edifísiu pré-eskolár ne’e atinje pursentu 40 (%), fondasi, sinta no ai-rin hotu ona, konstrusaun ida-ne’e konstrui husi ita-nia badaen sira suku Bahatata nian ho durasaun ba konstrusaun ne’e sei finaliza tinan ida-ne’e,” nia esplika.
Nia esklarese katak projetu konstrusaun edifísiu pre-eskolár ne’e atraza uituan tanba kondisaun estrada aat difikulta transporte atu tula materiál konstrusaun bá suku Bahatata.
“Agora ne’e udan para ona ne’ebé transporta materiál fabrikanu mós di’ak ona, ita-nia badaen sira sei aselera serbisu,” nia hatutan.
Pre-eskolár iha suku Bahatata harii iha tinan 2024 hodi akumula estudante hamutuk 30 ho ninia profesór hamutuk 2.
Jornalista : Vitorino Lopes da Costa
Editór : Agapito dos Santos
