DILI, 30 setembru 2024 (TATOLI) – Tribunál Judisiál Primeira Instánsia Dili (TJPID), liuhusi Juiz koletivu João Riveiro, Julmiati Freitas no José Gonsalves , iha segunda (30/9)) ne’e, kotinua halo audiénsia julgamentu ba kazu partisipasaun ekonómia iha negósiu no krime administrasaun danoza ne’ebé envolve husi António da Conceição ‘Kalohan’ inklui arguidu na’in-12.
Iha audiénsia ne’e, Tribunál rona uluk arguidu ho inisiál FL ne’ebé uluk asume kargu hanesan Diretór Jerál Servisu Indústria iha 2015.
Arguidu rekorda katak iha 2015 iha grupu benefisiáriu balun mak hato’o duni sira-nia proposta mai MCIA atu asesu ba osan subensaun públika, ho objetivu atu apoia produsaun industrial ne’ebé organiza husi Aileu, Ainaro no Same.
“Proposta hirak ne’e ita-nia grupu benefisiáriu hato’o direta ba Gabinete Ministru Komérsiu Indústria señor António da Coceicão no iha ne’ebá mak ministru despaisu tún mai fali hodi halo reverifikasaun ba benefisiáriu sira-nia dokumentu. Hanesan diretór jerál indústria, momentu ne’eba ha’u forma kedan ekipa tún ba terenu hodi halo reverifikasaun ba benefisiáriu sira-nia dokumentu no haree sira-nia atividade”, arguidu FL deklara iha sala julgamentu TJPID, segunda, ohin.
Nia dehan, bazeia ba ekipa inspesaun husi diresaun jerál indústria MCIA hateten katak grupu benefisiáriu ida mak halo produsaun modo iha Ainaro no priénse rekezitu hotu atu asesu ba osan subensaun ne’ebé iha MCIA atu fortifika sira-nia atividade.
“Ha’u-nia ekipa téknika informa mai ha’u katak laiha problema, buat hotu los hotu ona, ne’e mak ha’u prepara kontratu hodi enkamiña ba diresaun jerál finansas MCIA nia atu halo pagamentu”, nia adianta.
Fatin hanesan, arguidu ho insiál LI fó mós nia depoimentu ba Tribunál hodi hateten katak iha 2015 nia asume kargu hanesan diretór jerál administrasaun finansa iha MCIA.
Nia esplika, kualker proposta ne’ebé mak tama mai iha MCIA ne’e la liuhusi diretór jerál, maibé ba direta iha gabinete ministru, kuandu ministru haree no halo tiha aprovasaun, hafoin ministru despaisa ba diretór jerál hodi halo reverifikasaun ba dokumentu sira.
“Diretór jerál la halo aprovasaun ba ema nia pedidu. Pedidu ne’e hetan aprovasaun husi ministru no ministru despaisu ba diretór jerál hodi husu forma ekipa hodi halo verifikasaun”, nia afirma.
Nia rekoñese katak momentu sei asume kargu hanesan diretór jerál administrasaun finansa, MCIA iha grupu benefisiáriu hamutuk 12 mak hatama sira-nia pedidu mai hodi husu osan subvensaun atu apoia sira-nia atividade.
Nia lembra katak entre grupu benefisiáriu sira ne’e iha pedidu ida mak husi Prezidente Kámara Komérsiu Indústria Munisipiu Suai señor Julio do Carmo ne’ebé husu MCIA atu fó apoiu hodi halo reabilitasaun ba edifísiu Kámara Komérsiu no Indústria iha Suai.
“Orsamentu ne’ebé mak momentu ne’e ha’u aprova ne’e hodi apoiu ba grupu sira ne’e montante $4000”, nia haktuir.
Nia dehan, bainhira iha pagamentu daruak ba grupu sira ne’e mosu ona problema, katak grupu benefisiáriu balun uza osan subvensaun husi MCIA maibé atividade lala’o ona.
“Atu halo pagamentu daruak ne’e mak agora mosu tiha problema, agora kazu ne’e mai tiha Tribunál”, nia hakotu.
Jornalista:Natalino Costa
Editór : Zezito Silva
