DILI, 01 outubru 2024 (TATOLI) – Diretór Servisu Apoiu Diagnóstiku no Terapeútiku iha Hospitál Nasionál Guido Valadares (HNGV), Vidal Lopes, hateten pasiente hamutuk 80 mak seidauk haruka ba rai liur hodi halo tratamentu saúde tanba sei hein desizaun husi nivel altu sira.
Pasiente hirak ne’e seidauk hetan tratamentu iha ospitál liur tanba dívidas millaun $20 ne’ebé seidauk selu ba nasaun tolu hanesan Malázia, Singapura no Indonézia, tanba ne’e Junta Médiku iha HHNGV, seidauk halo transferénsia pasiente sira.
“Ita hatene katak ita enfrenta hela situasaun ida ne’ebé Governu liuhusi Ministériu Saúde tenke rezolve ho ospitál sira ne’ebé ita halo MoU ba, hanesan Singapura, Malázia no Indonézia, tanba ita iha pasiente na’in 80 ne’ebé sei pendente hela, bainhira ita-nia Governu rezolve ona ita bele halo transferénsia ba”, Vidal Lopes dehan ba jornalista sira iha HNGV, ohin.
Vidal Lopes esplika, husi pasiente sira ne’e maioria moras kankru no problema fuan, maibé sei hein desizaun sira husi nivel altu sira, bainhira pasiente tama iha faze ida ne’ebé mak grave médiku sira halo atendimentu iha ne’e.
“Ita nafatin halo tratamentu iha ne’e, ita la husik pasiente ne’e to’o mate bainhira pasiente tama faze krítiku ita, uza ita-nia sistema HNGV hodi halo atendimentu nafatin ba sira hodi hein desizaun sira tuir mai”, nia konklui.
Notísia relevante : Ministériu Saúde halo ona pagamentu balun ba ospitál tolu iha estranjeiru
Jornalista : Felicidade Ximenes
Editór : Zezito Silva
