DILI, 01 outubru 2024 (TATOLI)–Primeiru-Ministru (PM), Kay Rala Xanana Gusmão, tersa ne’e, konvoka enkontru ho Embaixadór dezignadu Timor-Leste ba Koreia Súl, António de Sá Benevides, hodi fó orientasaun ruma no halo despedida molok dezloka bá hala’o misaun diplomátika.
“Hasoru Primeiru-Ministru hodi simu orientasaun molok desloka bá Koreia Súl iha semana ida-ne’e. Primeiru-Ministru husu atu fó atensaun másimu ba traballór timoroan sira ne’ebé maka sees-an husi sistema. Ida-ne’e ita tenke fó prioridade no atensaun másimu, konsola, no hasoru malu ho sira hodi identifika didi’ak problema depois ajuda sira la’o di’ak,” Embaixadór Benevides hateten hafoin enkontru ho Xefe Governu, iha Palásiu Governu.
Notísia relevante : Governu Koreia Súl sei deporta traballadór timoroan 11 iha semana ne’e
PM Xanana husu embaixadór atu reprezenta didi’ak nasaun Timor-Leste iha Koreia Súl, buka hametin liután kooperasaun ne’ebé durante ne’e la’o ona no loke mós espasu ba kooperasaun sira seluk.
Embaixadór ne’e mós promete ba Xefe Governu atu kontinua kooperasaun sira ne’ebé durante ne’e nasaun rua estabelese ona hanesan iha área desportu no seluk tan.
Sekretaria Estadu Formasaun Profisionál no Empregu (SEFOPE) haruka ona traballadór hamutuk 780 bá Koreia Súl iha tinan 2023 nia laran, ne’ebé na’in-576 serbisu iha peska no na’in-214 serbisu iha fábrika.
Enkuantu, Traballadór timor-oan ne’ebé serbisu iha Koreia Súl hahú husi tinan 2009 to’o 2024 hamutuk 5.914, ne’ebé husi númeru ne’e fila ona mai Timor 1.046, enkuantu kontinua serbisu 4.822.
Aleinde ne’e, SEFOPE rejista traballadór hamutuk 1.225 ne’ebé serbisu iha Koreia Súl hahú husi tinan 2009 to’o 2023 sai ona husi sistema.
Jornalista : Osória Marques
Editora : Julia Chatarina
