DILI, 02 outubru 2024 (TATOLI)–Governu Timor-Leste no Embaixada Repúblika Indonézia iha Timor-Leste (KBRI, sigla indonéziu) despede ona bolseiru timoroan na’in-70 hodi kontinua estudu iha Indonézia liuhusi programa The Indonesian AID Scholarship (TIAS) períudu 2024.
Embaixadór Indonézia iha Timor-Leste, Okto Dorinus Manik, informa, bolseiru sira-ne’e sei estuda iha universidade haat hanesan Universidade Indonezia (UI) iha Jakarta, Universidade Gadjah Mada (UGM) iha Jogja, Politékniku Enjiñaria Agrikultura Indonézia (PEPI) iha Banten, no Politékniku Kontabilidade Estadu (STAN) iha Banten iha nível baxaleratu, lisensiatura no mestradu.
“Nune’e eskola hirak-ne’e mak eskola di’ak liu iha Indonézia, ne’e hanesan parte ida hodi hametin apoiu Governu Indonézia ba Timor-Leste no ami espera katak ami-nia maun-alin na’in 70 sei sai pioneiru ba dezenvolvimentu Timor-Leste nian iha futuru. Ida-ne’e mak lideransa sira ne’ebé ita hein iha futuru,” Embaixadór Okto hateten durante serimónia despedida iha Sentru Kulturál Indonézia (PBI, sigla indonéziu, kuarta ne’e.
Notísia relevante : Governu loke ona vaga bolsa estudu ba jurista 70 iha Portugal
Estudante ne’ebé hetan bolsa estudu sei simu fasilidade sira ne’ebé hahú husi propina, akomodasaun viajen, hahán no osan ho valór, Rp 6.000.000 ba kada fulan, nune’e estudante sira sei foka liu ba prosesu estudu.
“Primeiru mak sira sei hetan osan fulan-fulan, tanba ne’e sira bele foka liu ba estuda. Ha’u fó atensaun ba sira atu uza didi’ak oportunidade ne’e tanba oportunidade ne’e mak oportunidade furak tebes,” nia akresenta.
Iha fatin hanesan, Ministru Ensinu Superiór, Siénsia no Kultura, José Honório da Costa Pereira Jerónimo, hodi Governu Timor-Leste nia naran, agradese ba Governu Indonézia tanba hili estudante na’in 70 husi Timor-Leste hodi kontinua sira-nia estudu.
“Sira sei estuda iha área kontabilidade, jestaun, agrikultura no área seluk tan. Ha’u husu ba ema ne’ebé simu bolsa estudu atu estuda nomós reprezentante Timor-Leste sira atu halo esforsu hodi hala’o sira-nia estudu atu nune’e sira bele kontribui ba dezenvolvimentu rekursu umanu iha Timor-Leste,” nia tenik.
Embaixadór rekoñese katak programa ITAS ne’e di’ak tebes no sei kontinua fali iha tinan oin ho prosesu selesaun ne’ebé rigorozu atu nune’e bele prodús rekursu umanu ne’ebé kualifikadu la’ós de’it iha teoria maibé mós iha prátika no tuirmai bele kontribui ba Timor-Leste.
Reprezentante Estudante, Lazaro Amaral, agradese tebes ba oportunidade husi TIAS tanba bele lori nia hala’o estudu iha nível mestradu iha UI iha área kontabilidade.
“Ami agradese ba Governu Indonézia, liu-liu ba Embaixada Indonézia tanba atende TIAS iha ne’e hodi fó oportunidade ba ami atu hetan bolsa estudu. Ami mós agradese ba Governu Timor-Leste tanba nia dedikasaun no ami hein katak ida-ne’e bele la’o di’ak atu nune’e iha futuru ita bele kontribui ba dezenvolvimentu nasaun,” nia katak.
Jornalista : Osória Marques
Editora : Julia Chatarina
