COVALIMA, 02 Outubru 2024 (TATOLI) – Xefe Departamentu Reflorestasaun Territóriál no Planta Industriál Covalima, Domingos Gusmão, alerta ba sidadaun sira atu labele sunu rai no kasa balada fuik sira iha tempu bailoro.
“Daudaun ne’e, guarda florestál serbisu maka’as halo patrullamentu rotina hodi prevene sidadaun sunu rai, tesi ai, nune’e ita bele livre husi poluisaun no problema dezastre naturál bainhira iha tempu udan monu rai”, Domingos Gusmão hateten, ohin.
Dirijente ne’e salienta katak, iha bailoro, sidadaun sira sempre sunu rai, tesi no kasa balada fuik, halo to’os muda bá-mai ne’ebé sai ona kultura, tanba ne’e atu halo prevensaun presiza halo patrullamentu atu sidadaun sira bele hamenus sira-nia atividade muda to’os bá-mai, kasa balada fuik no sunu rai.
Atu halo patrullamentu rotina, Floresta Covalima iha rekursu umanu hamutuk 28, maibé hasoru difikuldade tanba falta transporte, tanba karreta iha ida de’it, nune’e guarda florestál halo de’it vijilánsia konjunta hodi kobre to’o iha postu sira hanesan Fatululik, Fohorem, Fatumea, Tilomar, Maucatar no Suai.
“Ita-nia guarda florestál halo patrullamentu no bainhira hasoru sidadaun sira halo investigasaun, maibé durante halo patrullamentu seidauk kaptura sidadaun ruma”, dehan.
Papél Floresta nian mak atu asegura balada fuik sira, ai-laran tuan no ai sira ne’ebé iha valór ekonómiku hanesan Ai-Ná ektare 25 no Ai-Saria ektare 25 no Ai-Kameli ektare 50, ne’ebé daudaun ne’e kuda ona iha postu Zumalai, suku Zulo no Ai-Kameli ektare 6 iha suku Casabauk, postu Tilomar.
Sidadaun João Amaral sujere atu iha tempu bailoro guarda floretál sira presiza halo patrullamentu ho máximu, tanba ema sempre sunu rai, tesi ai, hodi fó impaktu maka’as bainhira udan hamosu dezastre naturál no seluk tan.
“Ita hatene katak guarda florestál halo patrullamentu, maibé tenke halo sensibilizasaun hodi hasa’e sidadaun sira-nia koñesimentu kon-ba impaktu husi sunu rai, tesi ai no kasa balada fuik sira iha tempu kalan”, nia rekomenda.
Notísia relevante: Redús sunu rai arbiru presiza sidadaun sira-nia konsiénsia
Jornalista: Celestina Teles
Editora: Maria Auxiliadora
