DILI, 02 outubru 2024 (TATOLI)–Governu liuhusi reuniaun ordinária Konsellu Ministru (KM), kuarta ne’e, aprova projetu dekretu-lei, ne’ebé aprezenta husi Ministru Asuntu Kombatente Libertasaun Nasionál, Gil da Costa Monteiro ‘Oan Soru’, kona-ba alterasaun daruak ba dekretu-Lei nú. 7/2018, loron 28 marsu, kona-ba estatutu orgániku Konsellu Kombatente Libertasaun Nasionál (CCLN, sigla portugés).
“Ojetivu mak atu ajusta Konsellu ba realidade atuál, liuhusi kriasaun estrutura orgánika ne’ebé efisiente liu, ne’ebé sei kontribui ba hamenus despeza sira ne’ebé la nesesáriu iha ninia órgaun balun. Iha intensaun mós atu reforsa kompeténsia sira CCLN nian kona-ba Fundu Investimentu Veteranu, hodi insentiva kriasaun atividade sira ne’ebé hamosu rendimentu, nune’e promove dezenvolvimentu ekonómiku nasionál,” referidu nota ne’ebé Agência Tatoli asesu, hafoin reuniaun ezekutivu, iha Palásiu Governu.
Notísia relevante : CCLN relata preparasaun selebra loron nasionál no kriasaun fundu veteranu ba PM
Hafoin liu tiha tinan-neen aprovasaun ba estatutu orgániku CCLN, no ho esperiénsia ne’ebé hetan, liu-liu ho kriasaun Fundu Investimentu Veteranu nian.
Inisiativa ne’e rekoñese nesesidade atu garante ninia jestaun adekuada hodi atribui ba Administrasaun CCLN nia kompeténsia.
Jornalista : Osória Marques
Editora : Julia Chatarina
