DILI, 02 outubru 2024 (TATOLI)—Primeiru-Ministru (PM), Kay Rala Xanana Gusmão, aprezenta projetu Rezolusaun Governu ida iha ámbitu reuniaun Konsellu Ministru (KM) ordinária, kuarta ne’e, kona-ba kumprimentu Rejime Eskluzividade ba Funsionáriu sira iha Administrasaun Públika.
“Rejime ne’e prevene funsionáriu sira atu akumula empregu remuneradu ka partisipa iha atividade sira ne’ebé afeta sira-nia independénsia ka dezempeñu profisionál,” referidu nota ne’ebé Agência Tatoli asesu hafoin reuniaun ezekutivu, iha Palásiu Governu.
Objetivu husi Rezolusaun Governu ne’e atu garante katak funsionáriu públiku hotu, iha rai-laran ka iha rai-li’ur, kumpre ho rigorozu rejime eskluzividade, hanesan prevee ona iha Estatutu Funsaun Públika, iha ámbitu administrasaun direta no indireta Estadu nian.
Notísia relevante : KNPTL husu ME hatudu notifikasaun liuhosi artigu 116 lei funsaun públika
Rezolusaun Governu ne’e determina realizasaun auditoria no inspesaun iha departamentu governamentál sira, nune’e bele asegura implementasaun ba norma ida-ne’e.
Aleinde ne’e, relatóriu sira kona-ba kumprimentu rejime nian tenke submete ba ida-idak nia Ministru iha prazu fulan-ida hafoin rezolusaun ne’e tama iha vigór.
Iha biban hanesan, KM aprova projetu dekretu-lei, ne’ebé aprezenta husi Ministru Prezidénsia Konsellu Ministru ein-ezersísiu, Expedito Dias Ximenes, kona-ba alterasaun dahuluk ba dekretu-lei nú. 46/2023, loron 28 fulan-jullu, kona-ba Orgánika Governu Konstitusionál da-9 nian.
“Ho diploma ida-ne’e, Sekretaria Estadu Komunikasaun Sosiál (SEKOMS) sai autónomu, hahú iha atribuisaun rasik iha ámbitu Prezidénsia Konsellu Ministrus (PCM, sigla portugés,” esplika nota husi ezekutivu.
Objetivu husi alterasaun ne’e mak atu hadi’a efikásia, efisiénsia no kualidade servisu sira ne’ebé presta ba sidadaun sira, liu-liu kona-ba direitu atu informa no atu hetan informasaun.
Atribuisaun sira husi Sekretaria Estadu Komunikasaun Sosiál ne’e sei define iha ninia lei orgánika, ne’ebé sei hetan aprovasaun durante loron-60 nia laran, no kompleta ho kompeténsia sira ne’ebé tuir lei, delega ba Sekretáriu Estadu husi Konsellu Ministru ka husi Ministru Prezidénsia Konsellu Ministru.
Jornalista : Osória Marques
Editora : Julia Chatarina
