COVALIMA, 02 Outubru 2024 (TATOLI) – Servisu Rejistu no Verifikasaun Emprezariál (SERVE, I.P) sukursál Covalima arrekada, entre Janeiru no Setembru, kontribui ona $15.474 ba kofre Estadu.
Koordenadór SERVE Covalima, Pedro Domingos dos Santos, hateten reseita ne’e mai husi sidadaun-sira ne’ebé halo rejistrasaun foun hamutuk 202, renovasaun dokumentu 316 no halo alterasaun ba dokumentu 109.
“Reseita ne’e tanba sidadaun sira ne’ebé hasai lisensa halo renovasaun dokumentu ne’ebé selu $60, renova Sertidaun Rejistu Komersiál $5 no renova Sertifikadu Rejistu Komersiál $5”, Pedro Domingos dos Santos informa iha Kampung Baru, ohin.
SERVE Covalima daudaun ne’e iha funsionáriu kontratadu na’in-23, inklui ho Koordenadór hodi presta sira-nia serbisu iha área sira hanesan atendimentu, administrasaun, IT, arkivu no baze dadus nian.
Antes ne’e, SEFVE iha de’it funsionáriu na’in-tolu mak hala’o knaar hodi hala’o serbisu multifunsaun iha kada loron hodi atende sidadaun sira.
Lembra katak, iha 2023, SERVE arrekada ona reseita hamutuk $14.812 ba kofre Estadu, ne’ebé mai husi rejistu foun hamutuk 225, halo alterasaun ba dokumentu 83 no renovasaun 444.
Notísia relevante: SERVE Covalima arrekada reseita $7.332
Jornalista: Celestina Teles
Editora: Maria Auxiliadora
