DILI, 02 outubru 2024 (TATOLI)–Reitór Universidade Nasionál Timor-Lorosa’e (UNTL), João Soares Martins no Reitór Baoshan University (iha provínsia Yunnan-Xina), Chu Yanhuai, foin lalais ne’e, selebra akordu hodi koopera iha área Agrikultura.
“Ita asina ona akordu ho Universidade Baoshan Xina no ami halo diskusaun kona-ba kooperasaun, maibé sira hakarak ita koopera iha Agrikultura liu-liu produsaun kafé, no sira mós hakarak fó oportunidade ba ita-nia estudante fakuldade Agrikultura sira atubele ba halo estudu komparativu iha sira-nia universidade,” Reitór UNTL hafoin asina akordu iha sala vídeo-konferénsia UNTL, hanesan haktuir iha nota ne’ebé Agência Tatoli asesu, kuarta ne’e.
Notísia relevante : Peritu: Kafé Timór iha sabór, bainhira dezenvolve sei hetan kualidade aas
Reitór Baoshan University, Chu Yanhuai, orgullu tanba bele halo kooperasaun ho UNTL ba produsaun kafé.
“Ha’u sente onradu tebes mai iha Timor-Leste no vizita mós UNTL ba dahuluk hodi konsege asina ona akordu, ami mai iha ne’e ami hatene katak UNTL mak universidade públiku iha Timor-Leste no ha’u rona katak UNTL prodús ona rekursu kualifikadu barak no balun sai Prezidente Repúblika,” nia akresenta.
Aleinde ne’e, Reitór Baoshan University nota katak Timor-Leste iha poténsia ba kafé.
Jornalista : Osória Marques
Editora : Julia Chatarina
