DILI, 03 outubru 2024 (TATOLI)—Ajénsia Nasionál Avaliasaun Akreditasaun Akadémika (ANAAA) no João Saldanha University (JSU), kinta ne’e, realiza feira no semináriu nasionál, iha ámbitu aniversáriu ANAAA ba dala-XIV.
Diretór Ezekutivu ANAAA, Nilton Paiva, hateten, tinan kotuk bainhira dada rifa, JSU mak hetan, nune’e ohin ANAAA hamutuk ho JSU realiza eventu ida-ne’e.
“Objetivu prinsipál husi feira nasionál ne’ebé hala’o durante loron-rua, ohin no aban ne’e dahuluk atu komemora aniversáriu, objetivu daruak atubele hametin lasu amizade entre instituisaun ensinu sueperiór tantu públiku ho privadu, no datoluk atu promove insituisaun ensinu superiór ba ensinu sekundáriu sira tanba ita hatene katak estudante husi ensinu sekundáriu presiza hatene saida mak insituisaun ensinu superiór, nune’e ita fornese hela hanesan programa estudu, fakuldade, no departamentu ne’ebé eziste,” Diretór Ezekutivu ANAAA, Nilton Diamantino Paiva Mau, informa iha resintu JSU, Usuleu-Hera.
Notísia relevante : ANAAA planeia halo akreditasaun ba programa 19 no instituisaun neen
ANAAA serbisu hamutuk JSU hodi fornese fatin ba realizasaun atividade no hametin parseria.
Institutu ensinu superiór 10 partisipa feira no semináriu, no kompetisaun ne’e envolve estudante sekundáriu jerál sira hanesan São Pedro no Eskola Sekundáriu São José Operário.
Instituisaun ensinu superiór ne’ebé partisipa iha feira mak hanesan Institutu Superiór Cristal (ISC), Institutu Siénsia Saúde (ICS), Institutu Professional de Canossa (IPDC), Institutu Boaventura Timor-Leste (IBTL) Same, Instituto Católica a Para Formação Professores (ICFP) Baucau, Universidade da Paz (UNPAZ), Universidade Oriental Timor Lorosa’e (UNITAL), JSU, Institutu São João de Brito (ISJB), Institutu de Filosofia e da Teologia (ISFIT).
Iha fatin hanesan, Fundadór JSU, João Saldanha, informa, ohin loron iha espozisaun no aban mak sei realiza semináriu ho tema: ‘ita-nia fé mak ita-nia kultura’, ne’ebé hatutan mensajen husi Papa Francisco.
“Ida-ne’e hanesan oportunidade hodi hatudu ita-nia produtu institutu ensinu superiór ba estudante husi ensinu sekundáriu. Tanba ne’e, liuhusi semináriu ne’e halo promosaun ba ita-nia produtu sira iha rai-laran, la’ós de’it ba produtu kafé no foos maibé importante mós ita halo promosaun ba rekursu umanu. Ida-ne’e mak prosesu ida husi ita la’o no forma di’ak hodi halo parseria ho reguladór ANAAA, Ministériu Ensinu Superiór, Siénsia no Kultura inklui institutu ensinu superiór sira,” nia tenik.
Nune’e, João Saldanha iha esperansa katak estudante bele haree produtu ne’ebé mak institutu ensinu superiór sira aprezenta no estudante sira mak bele hili tuir preferénsia.
Aleinde ne’e, instituisaun foun kontente tanba bele hetan fiar no ohin realiza atividade.
“Biban ne’e, hakarak aproveita tempu hodi apela ba estudante sira atu apreende no koñese malu ba liuhusi feira no semináriu ida-ne’e, mak foin bele hatudu kualidade institutu ensinu superiór, nune’e bele hasa’e imi-nia koñesimentu no kapasidade,” Fundadór JSU hameno.
Reprezentante IBTL Same, Anamira Cardoso Marques de Araújo, sente orgullu no apresia ho ANAAA tanba bele iha inisiativa di’ak hodi loke feira no semináriu ne’e hodi lori públiku bele hatene programa sira.
“Ohin ami lori ami-nia instituisaun nia programa, estrutura IBTL, liu-liu programa fakuldade haat iha atividade ida-ne’e, husi fahe informasaun ba estudante sira husi universidade seluk husi munisípiu seluk no iha Dili laran rasik,” nia katak.
Anamira Cardoso dehan, liuhusi atividade ida-ne’e bele halo promosaun ba institutu nia programa.
“Ha’u kontente mai to’o iha fatin ida-ne’e hodi promove ami-nia programa IBTL no hakarak rekomenda ba ANAAA atu iha futuru bele loke mós feira ida iha ami-nia institutu iha Same,” nia katak.
IBTL iha fakuldade haat hanesan Saúde, Ekonómia, Enjeñaria, no Agrikultura.
Jornalista : Osória Marques
Editora : Julia Chatarina
