Top

Deputadu komisaun B husu Governu altera lei Migrasaun no Azilu

Deputadu CNRT, Natalino dos Santos. Imajen Tatoli/Francisco Sony

DILI, 03 outubru 2024 (TATOLI)—Deputadu membru komisaun B trata asuntu Negósiu Estranjeiru no Defeza ho Seguransa iha Parlamentu Nasionál (PN), Natalino dos Santos, husu Governu liuhusi Ministériu Interiór (MI) atu altera lei Migrasaun no Azilu.

Notísia Relevante: PN aprova projetu-lei migrasaun no azilu iha jeneralidade

“Tenke altera, tanba iha lei Migrasaun no Azilu ne’e, iha ne’eba fó rezidénsia permanente ba ema seim limite ne’e problema, depois ita haree katak iha Governu anteriór sira mak halo alterasaun ba lei ne’e,” Nia hateten ba jornalista sira iha resintu PN, kinta ne’e.

Nia dehan, ida-ne’e afeta tebes tanba ema balun atu hetan kriteira hetan rezidénsia permanente sira kaben tiha ho timoroan sira, hafoin sira hetan tiha rezidénsia permanente abandona tiha timoroan.

“Entaun, haree ema sira-ne’e ho intensaun aat, hodi sira bele hetan tiha kondisaun hodi hela iha ne’e hodi lei ne’ebé mak fó dalan ba sira atu hela rezidénsia permanente iha ne’e,” nia dehan.

Tuir nia, ida-ne’e grave tebe-tebes tanba Timor-Leste nasaun kiik no populasaun komesa aumenta ba beibeik entaun fó impaktu ba futuru ladi’ak, tanba ne’e presiza halo revizaun fila-fali lei Migrasaun no Azilu hodi bele fó kondisaun proteje timoroan sira.

“Tanbasá ha’u kestiona ne’e. Ita haree daudaun imigrante barak loos, tantu husi Xina, Pakistaun, Srilanka, India, sira mai ho tipu estratéjia oioin, ida ne’e problema boot. Se Estadu la sériu atu haree kestaun ida-ne’e, ba futuru ita-nia oan no beioan sira mak sofre konsekuénsia husi situasaun ne’e,” nia hateten.

Iha parte seluk, Deputadu husi bankada CNRT ne’e mós husu atu altera lei investimentu tanba preokupa ho prezensa xineza sira hamate tebes negosiante timoroan ne’ebé loke negósiu kiik.

“Tenke altera lei investimentu hodi fó kondisaun sé mak atu investe ne’e atu halo investimentu ida-ne’ebé fó kampu traballu, investe iha indústria no iha buat seluk ne’ebé timoroan labele. Maibé, agora sira mai atu loké kioske, restorante, ida-ne’e ita fó autorizasaun hotu ba sira, ne’e problema boot,” nia dehan.

Notísia Relevante: Servisu Migrasaun introdús matéria haat kona-ba Lei Migrasaun no Azilu

Jornalista : Nelson de Sousa

Editór        : Cancio Ximenes

Publisidade

Leave a Reply

Latest Post

error: Content is protected !!