COVALIMA, 03 Outubru 2024 (TATOLI) – Servisu Munisipál Edukasaun Covalima rejista estudante hamutuk 2.542 iha tinan letivu 2024 mak sei realiza ezame nasionál iha loron 14 Outubru ne’e.
“Atu hasoru ezame nasionál, eskola sira dadaun ne’e halo ona preparasaun mak hanesan eskola bázika sentrál, eskola sekundária sira no tékniku vokasionál sira forma ona komisaun”, Xefe Departamentu Dezenvolvimentu Parke Eskolár, Beneditos Asa, iha Santa Rosa, ohin.
Responsavel ne’e dehan durante prosesu ezame nasionál la’o, Servisu Edukasaun Covalima halo monitorizasaun husi li’ur no profesór vijilante sira mak tama iha saladeaula atu kontrola estudante sira.
Ba estudante sira ne’ebé la tuir ezame nasionál tanba moras sei iha oportunidade ba alunu sira atu tuir ezame nasionál segunda xamada, maibé alunu ne’ebé sai ona husi eskola, nia naran iha lista tau de’it la tuir ezame nasionál.
Eskola bázika sentrál hamutuk 24 ho nia totál alunu 1.362, eskola sekundáriu haat ho estudante hamutuk 954 no eskola tékniku vokasionál haat ho totál alunu 226 mak sei realiza ezame ne’e.
Diretór Eskola Bázika Sentrál Fohobua, Bendito do Nascimento, dehan atu hasoru ezame nasionál eskolaFohobua hala’o ona enkontru hodi forma komisaun ezame nasionál hodi hili profesór vijilante hamutuk na’in-lima.
“Estudante Fohobua ne’ebé atu tuir ezame nasionál hamutuk 40, ne’ebé uza sala rua de’it no kada saladeaula iha estudante na’in-20, nune’e sira preparadu ona”, nia realsa.
Notísia relevante: Estudante finalista 58.271 mak sei partisipa ezame nasionál iha loron 14 outubru
Jornalista: Celestina Teles
Editora: Maria Auxiliadora
