DILI, 03 outubru 2024 (TATOLI)–Diretór Ezekutivu Lao Hamutuk, Celestino Gusmão Pereira, sujere ba Komisaun organizadora ba eventu vizita Amu Papa nian hodi hato’o relatóriu ezekusaun ba orsamentu millaun $12 ba preparasaun vizita Papa Francisco mai Timor-Leste ba Parlamentu Nasionál.
Notísia Relevante: PN seidauk simu relatóriu ezekusaun millaun $12 ba preparasaun vizita Papa Francisco
“Ha’u hanoin komisaun organizadora tenke halo relatóriu, tanba vizita sua Santidade Papa Francisco ne’e halo atividade barak. Entaun, Governu liuhusi komisaun organizadora presiza halo relatóriu no relatóriu sira-ne’e presiza halo audit,” Diretór Ezekutivu Lao Hamutuk, Celestino Gusmão Pereira, hateten ba Agncia Tatoli, iha Bebora.
Nia mós husu ba Parlamentu Nasionál bele halo fiskalizasaun ordináriu ne’ebé sira halo baibain ba projetu emerjðensia sira-ne’e hodi hatene oinsá gastu ba orsamentu ne’e ba atividade no projetu sira ho karáter emerjénsia.
“Se iha duni indisiu má administrasaun ka tendénsia ba korrupsaun, Parlamentu Nasionál iha autoridade atu kria komisaun eventuál ida hodi halo investigasaun,” nia dehan.
Fiskalizasaun ne’e la’ós dehan atu hatene sala ka la sala, maibé serbisu babain ne’ebé instituisaun sira asume ba hodi halo tarefa sira-ne’e. Se di’ak karik atu sai referénsia ba Governu sé de’it no ladi’ak karik atu hadi’a ba iha loron aban no sai lisaun ida atu aprende.
Aprezentasaun relatóriu no fiskalizasaun ba iha ezekusaun orsamentu no obra sira-ne’e atu kontribui mós ba iha boa-governansaun iha administrasaun públika sira iha instituisaun Estadu nian.
“Ha’u fó opiniaun jerál ida katak presiza iha relatóriu no Parlamentu Nasionál no Komisaun Antí Korrupsaun iha liu autoridade ba investigasaun no fiskalizasaun,” nia dehan.
Jornalista : Jesuína Xavier
Editór : Cancio Ximenes
