DILI, 03 outubro 2024 (TATOLI) – Komandante Polísia Nasionál Timor-Leste (PNTL), Munisípiu Dili, Superintendente Xefe Polísia, Orlando Gomes, hateten PNTL buka tuir hela suspeitu ho inisiál A ne’ebé tiru vítima Joanico Varela iha área Karega-Tiru, Taibesi, Postu Administrativu Cristo-Rei , Munisípiu Dili, kuarta horseik.
Kazu ne’e akontese iha kuarta (02/10) iha tuku 18:00 loraik, bainhira vítima Joanico Varela lori lilin ba sunu iha rate Becuse, bainhira vítima atu fila ba uma no hakat husi portaun rate mai iha li’ur, supeitu ho inisiál A lidera grupu joven ida hein ona vítima atu halo asaun hasoru vítima Joanico.
Supeitu sira baku no tiru besi beton ne’e ba Joanico Varela, ho hahalok suspeitu sira-nia ne’e rezulta Joanico kanek grave iha nia ulun parte kotuk.
Hafoin ida-ne’e, ekipa patrolla Komandu PNTL Dili iha momentu ne’ebá halo patrollamentu iha área Taibesi haree no halo kedan autuasaun ba kazu ne’e. Nune’e konsege salva tiha vítima Joanico Varela hodi lori nia ba halo tratamentu iha óspitál nasionál Guidu Valadares Dili, enkuantu autór prinsipál ho inisiál A halai lakon.
“Supeitu ba kazu ida-ne’e halai, maibé ita identifika ona ninia paradeiru. Ita ba to’o iha nia uma hodi bolu nia inan no aman hodi sira bele fó hanoin ba nia oan atu nia bele fila hodi mai hodi responsavél nia hahalok ne’ebé nia halo”, Superintendente Xefe Polísia, Orlando Gomes hateten ba jornalista sira iha nia kna’ar fatin Fatuhada Dili.
Orlando hateten, kazu ne’e Komandu PNTL rejista ona no haruka ona ba Ministériu Públiku.
“Agora suspeitu laiha nia uma, nia sempre muda nia fatin, entaun ita husu ba ita-nia servisu informasaun sira atu buka tuir nafatin suspeitu ne’e, kuandu hetan kaptura nia lori mai, hodi submete ba prosesu”, nia informa.
Komandante PNTL Munisípiu Dili, salienta motivu husi kazu ne’e mai husi problema partikulár.
“Kuandu joven ne’e ba rate lori lilin sunu, hafoin ida-ne’e nia sai mai iha grupu ki’ik hein ona nia ne’e signifika problema entre sira ho sira ne’e antes ne’e iha ona. Tanba nee mak kuandu nia vítima sai mai iha grupu ki’ik ida hein kedan hodi halo asaun hasoru nia”, nia konklui.
Jornalista: Natalino Costa
Editór : Zezito Silva
