DILI, 03 outubru 2024 (TATOLI)–Prezidente Repúblika (PR), José Ramos Horta vizita privadu bá Austrália husi loron 03 to’o 12 outubru 2024, ne’ebé vizita ne’e organiza husi Institutu Austrália ho eventu sira ne’ebé organiza hodi komemora ninia aniversáriu ba dala-30, hanesan parte ida husi programa kada tinan ne’ebé aprezenta líder proeminente sira.
“Vizita ida-ne’e reprezenta oportunidade importante ida atu hametin ligasaun sira entre Timor-Leste no Austrália. Ita-nia nasaun sira fahe istória ida-ne’ebé riku no kompromisu ba estabilidade no prosperidade rejionál. Ha’u hein atu hasoru malu ho líder, akadémiku, no sidadaun australianu sira atu esplora dalan oinsá ita bele hasa’e ita-nia interrese mútua sira no apreende husi ida-idak ninia esperiénsia sira,” referidu nota ne’ebé Agência Tatoli asesu, kinta ne’e.
Notísia relevante : PR Horta informa ba PN atu hala’o vizita privadu ba Repúblika Monáco
Prezidente Horta durante eventu ne’e sei fahe perspetiva úniku Timor-Leste nian kona-ba independénsia, dezenvolvimentu, no kooperasaun rejionál.
Durante vizita ida-ne’e, sei partisipa iha enkontru nível a’as, hato’o diskursu públiku, no partisipa iha eventu akadémiku sira iha sidade oin-oin Austrália nian hanesan Sydney, Canberra, Hobart, no Melbourne.
Aleinde ne’e sei aprezenta palestra ida kona-ba valór independénsia nian lisaun sira ne’ebé apreende hosi Timor-Leste nia dalan ba liberdade iha Sydney Opera House, hato’o palestra ba Klube Imprensa Nasionál iha Canberra no hasoru malu ho membru sira husi Parlamentu Austrália nian.
Prezidente nia vizita inklui mós vizita kortezia ho Governadór-Jerál Austrália, Sam Mostyn AC, enkontru ho australianu proeminente sira iha área polítika, negósiu no sira ne’ebé envolve ho solidariedade Timor-Leste nian, palestra no sesaun pergunta no resposta iha Universidade Tasmania, no partisipa iha eventu podcast diretu iha Universidade Victoria hodi diskute kona-ba lideransa, tranzisaun kareira, no esperiénsia pesoál sira.
Jornalista : Osória Marques
Editora : Julia Chatarina
