Estudante feto 3,013 iha Bobonaro simu ona vasina HPV
BOBONARO, 04 outubru 2024 (TATOLI)-Estudante Feto hamutuk na’in 3,013 iha Munisípiu Bobonaro simu ona vasina kontra virus Papiloma Umanu (HPV sigla Ingles) hodi hasa’e imunidade isin atu prevene-an husi moras Kankru susun.
Diretór Servisu Munisipál Saude, Munisípiu Bobonaro, Gíl Bernardo Vicente, esplika tuir alvu estudante ne’ebé elijivél simu vasina ne’e hamutuk 4,497 husi eskola Ensinu Báziku Sentrál (EBC, sigla portugés) no Ensinu Báziku Filiál (EBF) 143.
Notisia relevante: Estudante iha Viqueque na’in-3.743 konsege simu ona vasina HPV
“Estudante sira-ne’ebé hetan ona vasina hamutuk 3,013, sira hotu koopera husi eskola no estudante sira hotu-hotu hakarak hetan hotu vasina ida-ne’e tanba vasina ne’e importante tebes”
Diretór Gil Bernardo, informa ba Jornalista sira, iha kna’ar fatin, Soso Maliana.
Responsável Diresaun Servisu Munisipál Saude, Munisípiu Bobonaro ne’e fundamenta husi totál alvu ne’ebé enumera falta de’it estudante na’in 1,614 no eskola ne’ebé seidauk implementa vasina hamutuk 62.
Nia hatutan, hafoin konklui vasina ba estudante sira sei kontinua ba suku-suku atu vasina labarik feto idade elijivél ne’ebé la eskola.
“Ita-nia kooperasaun ho líder komunitária sira mós di’ak tebes, sira fahe ona informasaun ba komunidade, ami husi servisu saúde nunisípiu hakarak fó hatene ba inan-aman, komunidade sira atubele apoia tanba advokasia ita halo hotu ona, ne’ebé husu nafatin fó tempu atu vasina,” nia esplika.
Programa kampaña vasinasaun ne’e realiza liuhusi kooperasaun entre Ministeriu Saúde ho Organizasaun Mundiál Saúde (OMS).
Notisia relevante: Saúde Covalima lansa ona vasina HPV iha EBC Ogues
Jornalista: Sérgio da Cruz
Editór: Evaristo Soares Martins
