CNRT konsidera opozisaun la kumpre lei inkéritu Parlamentár

DILI, 07 outubru 2024 (TATOLI)—Deputadu bankada CNRT, Patrocínio dos Reis Fernandes, hateten bankada opozisaun la kumpre rejime jurídiku inkéritu Parlamentár.
Notísia Relevante: Opozisaun husu hala’o inkéritu Parlamentár iha setór saúde
“Sei la permite inkéritu Parlamentár, bainhira la prienxe rekezitu jurídiku inkéritu Parlamentár nian. Justifika duni iha plenária ida-ne’e rekerrente sira sai abandona plenária ida-ne’e hodi justifika rekerimentu ba inkéritu Parlamentár la tuir rejime jurídiku inkéritu Parlamentár nian iha artigu 8. Loos duni, balun kestiona kona-ba dehan iha artigu 4 obrigatóriu, ita haluha tiha katak, artigu 4 ne’e mai tuir kedas artigu 3 ne’ebé ko’alia kona-ba rekezitu ba inisiativa inkéritu Parlamentár, ne’ebé iha rekezitu ne’e la prienxe artigu 8 nian, ne’ebé ida-idak interpreta,” nia hateten liuhusi reuniaun plenária PN, segunda ne’e.
Antes ne’e, reuniaun plenária iha 23 Setembru 2024, PN diskute inkéritu Parlamentár númeru 1/VI(1a) konstituisaun komisaun Parlamentár inkéritu ba aktu Governu iha área saúde, ne’ebé aprezenta husi bankada opozisaun FRETILIN ho PLP, maibé labele halo votasaun tanba meza PN husu hadi’a objetu inkéritu Parlamentár ne’e iha pontu tolu, tanba antes ne’e bankada FRETILIN hato’o uluk ona keixa ba Prokuradória Jerál Repúblika (PJR) relasiona ho prosesu akizasaun medikamentu la lójika iha inkéritu ne’e atu tan saida ba matéria ne’e.
Tanba ne’e, meza laiha objesaun ba pedidu husi bankada opozisaun maibé husu atu hadi’a objetu inkéritu iha pontu tolu.
Enkuantu, ezerse funsaun fiskalizasaun tuir termu aleina b) númeru 1 iha artigu 2 no númeru 1 artigu 4 iha lei númeru 4/2009, 15 jullu, refere ba rejime jurídiku inkéritu Parlamentár, hodi husu ho obrigatória, konstituisaun komisaun ida inkéritu Parlamentár ho objetivu avrevigua no apresia politikamente ba aktu responsabilidade Governu.
Deputadu FRETILIN, Aniceto Longuinhos Guterres Lopes, dehan inkéritu Parlamentár ne’ebé parte opozisaun rekere ne’e, tuir lei ne’e nia prazu liu dook loos ona, tanba ne’e parte maiória husi bankada Governu mak trava inkéritu ne’e.
“Se dehan presiza iha entendimentu, entaun lei ne’e dehan obrigatóriu ne’e sentidu saida,” nia hateten.
Prezidente Parlamentu Nasionál, Maria Fernanda Lay, hein katak kona-ba inkéritu Parlamentár deputadu sira iha entendimentu ida.
Aleinde ne’e, nia dehan, PN agora sei baixa proposta-lei Orsamentu Jerál Estadu (OJE) 2025 ba komisaun permanente sira, nune’e posivelmente PN labele hala’o atividade rua ne’e hamutuk. Ne’ebé, hanoin aktu polítika permisível ita bele hala’o maibé simultaneamente OJE mós importante.
“Ne’ebé, ha’u espera katak ita ho pasiénsia ho posibilidade ne’e, ita bele entende malu,” nia dehan.
Jornalista : Nelson de Sousa
Editór : Cancio Ximenes

