FRETILIN bolu atensaun ba problema umanidade ne’ebé akontese iha Médiu Oriente
DILI, 07 outubru 2024 (TATOLI)—Bankada opozisaun FRETILIN iha Parlamentu Nasionál (PN), bolu atensaun ba problema umanidade nian ne’ebé akontese ho rai sira iha Médiu Oriente.
“Aproveita atu bolu atensaun ita hotu nian ba problema umanidade nian ne’ebé akontese ho rai sira iha Médiu Oriente. Tinan ida ona povu Palestina sofre husi ataka brutál forsa Israelita nian. Povu inosiente sira sai vítima ba funu ida desklibriu, hanesan saida mak Timor-Leste esprimenta iha tinan 24 nian laran hasoru rejime Soeharto nian. Maibé ho Solidaridade husi rai oioin, ikus mai ita hakotu duni barbaridade iha ita-nia rain. Apresia pozisaun Timor-Leste nian iha Nasaun Unida ba rezolusan kona-ba kazu Palestina nian,” Deputada FRETILIN, Veronica Fernandes, hato’o liuhusi deklarasaun polítika bankada iha reuniaun plenária PN, segunda ne’e.
Nia dehan, ikus ne’e hahú funu foun entre Lebano no Israel, Iraun no Israel ne’ebé kauza vítima mortál ne’e lamenta tebes ba pozisaun ba Estadu sira-ne’e nian, ne’ebé rekorre ba funu envezde tuur hamutuk hodi halo diálogu.
Funu ne’ebé hahú daudaun sei lori de’it konsikuénsia trájika ba umanidade, feto na labarik sira sei sofre liután.
“Ba situasaun ida-ne’e, Timor-Leste presiza ativu liu-tán atu ko’alia, liuhusi mekanizmu no platform internasionál sira ba hapara funu no buka diálogu hodi evita konsekuénsia katastrofika ba umanidade,” nia dehan.
Jornalista : Nelson de Sousa
Editór : Cancio Ximenes
