DILI, 07 outubru 2024 (TATOLI)—Meza Parlamentu Nasionál (PN), segunda ne’e, liuhusi reuniaun plenária anúnsiu no baixa proposta-lei Orsamentu Jerál Estadu (OJE) 2025 ba komisaun C trata asuntu Finansa Públika ho komisaun permanente sira seluk hodi bele elabora prosesu tuir mai.
Notísia Relevante: PN konsidera Governu kumpre LEO submete proposta-lei OJE 2025
“Anúnsiu no admisaun baixa ba komisaun asuntu Finansa Públika ho komisaun sira seluk espesializada permanente proposta-lei númeru 12/VI (2a) Orsamentu Jerál Estadu (OJE) ba 2025. Ha’u konvida komisaun ida-idak hahú komisaun C, no tuir kedas komisaun A, B, D, E, F, G,” Prezidente Parlamentu Nasionál, Maria Fernanda Lay, hateten iha sala plenária.
Antes ne’e, iha 02 outubru 2024, Deputadu sira Komisaun C hahú diskute preparasaun kalendáriu debate proposta-lei OJE 2025.
Prezidente Komisaun C, Cedelízia Farria dos Santos, dehan iha enkontru komisaun komesa haree ona preparasaun ajenda diskusaun, audiénsia ba proposta-lei OJE 2025, hodi hein meza PN sei baixa proposta-lei OJE 2025 mai komisaun liuhusi reuniaun plenária iha semana oin.
Nune’e, nia dehan, komisaun hahú halo analiza no dokumentu sira-ne’ebé mai komisaun sei realiza panorama orsamentál no audiénsia públika tuir ezbosu kalendáriu sei realiza hahú iha 21 outubru 2024 ho liña ministeriál.
Tanba pedidu husi Governu debate proposta-lei OJE 2025 tama ho kategória normál, mak PN sei presiza loron 45 atu aprova finál globál iha plenária.
Enkuantu, iha 01 outuburu 2024, Governu liuhusi Ministra Finansa (MF), Santina Cardoso, submete ona proposta-lei OJE 2025 ho montante billaun $2.6 ba PN.
Jornalista : Nelson de Sousa
Editór : Cancio Ximenes
