DILI, 08 outubru 2024 (TATOLI)–Institutu Nasionál Seguransa Sosiál (INSS), tersa ne’e, distribui motorizada 17 ba koordenadór destakadu iha munisípiu hodi halo servisu atendimentu ba públiku.
“Ohin ita distribui tan motorizada ba ita-nia koordenadór munisípiu sira. Motorizada ne’e hodi fasilita servisu atendemintu públiku, liu-liu oinsá atubele halo movimentasaun iha nível postu no suku sira no oinsá koordena ho autoridade suku sira ligadu levantamentu dadus no prosesu pagamentu idozu nian,” Prezidente INSS, Arlindo Pinto, hatete, ba Agência Tatoli, hafoin halo distribuisaun motorizada, iha resintu INSS, Caicoli.
Notísia relevante : Tránzitu alerta ba populasaun ne’ebé laiha dokumentu motorizada labele halo sirkulasaun
Prezidente INSS ne’ebé nu’udar pontu vogál deskonsentrasaun iha nível munisipál, konsidera presiza iha transporte hodi tulun halo servisu di’ak liután iha terrenu.
Nune’e motorizada 17 ne’e kada munisípiu hetan ida no seluk ne’e atu suporta servisu iha administrasaun nasionál.
“Biban ne’e husu ba koordenadór sira atu utiliza motorizada ho di’ak, kuida no tenke uza tuir nesesidade servisu atendimentu públiku nian, labele uza ba nesesidade privadu nian. Ita-boot sira nu’udar responsável husu atu uza ba oras servisu, labele utiliza iha loron feriadu inklui fim de semana, no motorizada ida-ne’e uza bainhira presiza. Motorizada ida-ne’e la’ós ba koordenadór de’it maibé funsionáriu ne’ebé destakadu INSS munisípiu sira mós bele utiliza ba servisu sira,” nia tenik.
Husi motorizada 17, unidade 13 ho marka KLX no no unidade haat ho marka mio-Genio.
Jornalista : Osória Marques
Editora : Julia Chatarina
