VIQUEQUE, 08 outubru 2024 (TATOLI)- Komunidade Ireler, suku Matahoi, postu administrativu Uatulari, Munisípiu Viqueque ne’ebé hela iha foho Matebian okos ho inisitiva kee rasik estrada hodi asesu bá merkadu,fasilidade saude no fasilita oan atu ba asesu eskola.
Komunidade Iraler, suku Matahoi, Mariano de Jesus, esplika, estrada ne’ebé daudaun kee ho manuál ne’e husi aldeia Iraler ba merkadu Laisorulai, Postu Quelecai munisípiu Baucau.
“Dalan ne’e iha tempu udan bee mak estraga hotu, nune’e transporte hanesan karreta no motorizada sira labele asesu. Nune’e komunidade sira atu bá sosa no faan produtu lokál ruma iha merkadu Laisorulai labele. Entaun ami komunidade sira no autoridade lokál deside hamutuk hodi kee ho materiál manuál purvolta kilómetru 3-resin ho luhan metru haat husi Iraler to’o área Nahae. Ami esforsu-an kee durante loron tolu no foin hotu”, Mariano de Jesus, hateten ba jornalista sira, iha aldeia Iraler, ohin.
Ho esforsu hirak ne’e, nia dehan daudaun ne’e karreta bele halo movimentu ona ba sira nia aldeia hodi faan sasán no komunidade sira mós bele asesu bá merkadu Laisosrulai.
“Maibé dalan referida iha tempu bailoron di’ak, tempu udan bee sei estraga fila-fali. Tanba ne’e husu Ministériu relevante tau matan ba ami-nia estrada hodi fasilita ami bele bá produtu lokál iha merkadu”, nia rekomenda.
Iha fatin hanesan, Xefe Aldeia Iraler, Mariano Amaral, reforsa iha tempu bailoron transporte liuliu karreta halo movimentu di’ak, maibé tempu udan labele halo movimentu.
“Preokupasaun kona-ba estrada ne’e ami autoridade sempre hato’o ba ministériu, maibé laiha resposta ruma ba ami-nia preokupasaun. Tan ne’e liuhusi oportunidade ida-ne’e, ami hato’o nafatin ba Ministériu relevante hodi tau perioridade, atu ami bele asesu no povu lori sira nian produtu lokál ba merkadu”, nia afirma.
Tuir dadús populasaun husi aldeia Iraler hamutuk 8.000 no totál uma-kain 200 ne’ebé hela iha foho matebian nia-okos.
Notísia relevante:MOP lansa fatuk dahuluk ba projetu estrada husi Uatulari bá Laisorulai
Jornalista : Vitorino Lopes da Costa
Editór : Florencio Miranda Ximenes
