BOBONARO, 07 outubru 2024 (TATOLI) – Profesór foun na’in-91 aprezenta-aan ba Autoridade Munisípiu Bobonaro hafoin deskata ba eskola idak-idak.
Prezensa manorin foun ne’ebé mai husi munisípiu seluk inklui munisípiu Bobonaro rasik ne’e simu direita husi Sekretáriu Autóridade Munisípiu Bobonaro ba Asuntu Sosiál, Júlio Carvalho Caero no Diretór Edukasaun Munisípiu Bobonaro, Miguel Freitas iha salaun Maria-Tapo.
Tuir planu, iha kinta seman ne’e mak parte Diresaun edukasaun Bobonaro sei destaka manorin hirak-ne’e ba Ensinu Báziku Sentrál (EBC, sigla portugés) no Ensinu Báziku Filiál (EBF) hamutuk 35 ne’ebé simu direita husi diretór no koordenadór eskola idak-idak.
Notísia relevante: Profesór 176 iha Bobonaro termina kontratu ho Ministériu Edukasaun
“Ami simu sira na’in-91 komposta husi feto 61 no mane 30 ne’e ho fuan no laran luak, ha’u fiar katak barak mak sei la hatene fatin atu hanorin ba, maibé Ministra Edukasaun rekomenda hela ba ita dehan ladún todan no ladún kmaan, presiza ita hotu-hotu halo tuir, ami uluk iha 1984 koloka ami balu ba Same, balu Viquque, depois mak sai na’in ba munisípiu ne’e,” Diretór Edukasaun Bobonaro, Miguel Freitas hateten iha intervensaun.
Nia dehan, kolokasaun ne’e bele responde ona preokupasaun dirijente eskola, inan-aman sira kona-ba menus no laiha profesór, tanba iha fulan hirak liuba mós Governu destaka ona manorin 67 ne’ebé selesionadu iha vaga faze dahuluk.
Nia apela ba manorin sira atu kumpre deklarasaun Xefe Governu, Kay Rala Xanana Gusmao ne’ebé husu atu serbí tuir misaun ne’ebé atribui no hadomi profisaun, hadomi estudante no inan-aman sira tuir karáter idak-idak nian.
“Ami edukasaun munisípiu Bobonaro sente kontente tebes, enkuantu haree sira mesak idade joven, entaun ami-nia esperansa sira-ne’e sei sai hanesan modelu di’ak iha eskola, atu nune’e sira mak bele fó motivasaun ba ita-nia profesór sira ho idade avansadu ona,” nia hateten.
Sekretáriu Autóridade Munisípiu Bobonaro ba Asuntu Sosiál, Júlio Carvalho Caero, enkoraja manorin sira atu presta serbisu ho responsablidade, dedikasaun hodi asegura kualidade edukasaun iha Timor-Leste, espesialmente munisípiu Bobonaro.
“Horbainhira hakilar-hakilar, governu prepara fatin, agora tenke ser hatudu saida mak ita-boot iha, saida mak akontese simu ho fuan boot no aten barani, fofoun ne’e mak ita-boot sira sei senti todan, fulan ida ka rua ne’e komesa koñese malu ona ne’e lae ona,” nia katak.
Tuir observasaun Ajénsia TATOLI iha serimónia ne’e, maioria manorin sira prontu kumpre desizaun husi Ministériu Edukasaun, maibé rekomenda de’it ba Autoridade Munisipál Bobonaro no Diresaun Servsiu Munisipál Edukasaun atu halo koordenasaun ho líder komunitária sira atubele prepara hela fatin.
Notísia relevante: EBF Poerema enfrenta problema laiha profesór
Jornalista: Sérgio da Cruz
Editór: Evaristo Soares Martins
