iklan

EDUKASAUN, BOBONARO, HEADLINE, MUNISÍPIU

Profesór 176 iha Bobonaro termina kontratu ho Ministériu Edukasaun

Profesór 176 iha Bobonaro termina kontratu ho Ministériu Edukasaun

Diretór Servisu Edukasaun Munisipál Bobonaro, Crispim Lopes Moniz. imajen Agência TATOLI/Sérgio da Cruz.

BOBONARO, 12 janeiru 2023 (TATOLI)-Profesór kontratadu hamutuk na’in-176 iha munisípiu Bobonaro termina ona kontratu ho Ministériu Edukasaun iha loron 31 fulan dezembru tinan 2023 liubá.

Diretór Servisu Munisipál Edukasaun Munisípiu Bobonaro, Crispim Moniz, esplika, desizaun ne’e bazea bá orientasaun hosi Ministra Edukasaun, Dulce de Jesus.

Notisia relevante: Profesór kontratadu Viqueque na’in-155 hosi eskola 15 termina kontratu

“Iha Bobonaro totál profesór ne’ebé asina kontratu iha 2023 hamutuk 176, sira-ne’e mak kontratu termina ona no laiha relasaun ho Ministériu Edukasaun, maibé horisehik ha’u ba Bobonaro, ha’u observa sira sei kontinua hanorin,  maibé sira dezesperadu, triste dehan ami-nia futuru oinsá, ami tama duni ka lae, maibé balu iha Eskola Nunura, horseik koordenadór informa Mai ha’u dehan balun abandona ona eskol,” nia informa bá Tatoli iha Maliana, sesta ne’e.

Nia subliña, profesór hirak-ne’e kolokadu hotu ba eskola sira iha postu administrativu neen no barak liu iha Eskola Sekundariu Jerál Númeru I Dom Martinho da Costa Lopes Maliana, tanba momentu ne’ebá eskola ne’e hasoru difikuldades kona-bá menus profesór.

Nia dehan, ligadu ho problema ne’e ensinu aprendizajen iha Eskola hotu-hotu sei la’o, maibé aula barak mak mamuk.

“Kuandu sira ne’e la ezerse sira-nia funsaun, ida-ne’e impaktu ona ba funsionamentu normál prosesu ensinu no aprendizajen, liuliu iha Eskola Dom Martinho da Costa Lopes, matéria hirak-ne’ebé profesór kontratadu sira lori ne’e aula sei mamuk, hanesan mós iha postu sira seluk, laiha profesór laiha proseu ensinu aprendizajen,” nia dehan.

Sorín seluk, Diretór Eskola Sekundáriu Jerál Númeru I, Dom Martinho da Costa Lopes Maliana, Abel Sarimau, reforsa, eskola ne’e hetan kolokasaun profesor kontratadu hamutuk 17.

Hosi númeru ne’e na’in-sia (9) ne’ebé asina kontratu iha 2023 mak Ministériu Edukasaun hakotu kontratu iha fulan ikus tinan kotuk.

Nia hatutan, profesor hirak-ne’e maioria hanorin estudante désimu anu ne’ebé responsabiliza ba disiplina jerál hanesan Tekonolojia Multimedia,nDalen Tetum, Maláiu ho seluk tán no na’in rúa mak hanorin matéria espesifiku hanesan Biolojia no Jeografia.

“Sira hanorin hosi dadeer to’o lokraik, haree tuir oráriu sira nafatin mai ativu hela, agora Eskola seidauk ko’alia ho sira,bmaibé ita akompañ iha mídia sosiál ne’e, Ministra ko’alia dehan nafatin fó Oportunidade ba sira atu konkore iha vaga,” nia katak.

Dirijente eskola ne’e informa, daudaun ne’e Eskola Dom Martinho simu estudante foun tinan letivu 2024 hamutuk 500-resin bazea va vaga ne’ebé Ministériu Edukasaun fó sai.

Maski profesor balu menus, maibé nia garante katak ensinu no aprendizajen sei kontinua la’o normál  iha semana oin.

“Ami-nia prosesu aprendizajen ne’e, hakarak ka lakohi segunda ne’e tenke la’o, ami lakohi dada, agora ami fahe turma, oráriu, ami-nia divizaun tarefa hotu ona, meiu ne’ebé mak ami uza atu troka profesór sira kontratadu remata maka pasiénsia ami tenke haree mestri sira-ne’ebé oras mamuk, provizoriumente atende lai ita-nia oan sira, labele husik mamuk, ida-ne’e ami rezolve hotu ona,” nia katak.

Enkuantu tuir dadus hosi servisu Munisipál Edukasaun Bobonaro totál  profesór permanente hamutuk 800-resin no kontratadu 563.

Notisia relevante: KNPK Baucau ejize Governu rezolve estatutu profesór kontratadu

Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!