BAUCAU, 11 janeiru 2024 (TATOLI) – Konsellu Nasionál Profesór Kontratadu (KNPK) Munisípiu Baucau ejize ba governu liuliu Ministériu Edukasaun atu rezolve estatutu kontratadu.
Portavóz konsellu nasionál profesór kontratu munisípiu Baucau, João Freitas liuhosi konferénsia imprensa, hato’o ejizénsia ba Ministériu Edukasaun no Sekretáriu Estadu Ensinu Sekundária Jerál no Tékniku vokasionál atu prosesa estatutu profesór kontratqdu ba engresu espesiál bazea ba dekretu-lei númeru 31/2023 , loron 31 fulan-marsu 2023.
“Bainhira la rezolve ami-nia estatutu, ami sei organiza malu atu direita ba nasionál atu husu klasifikasaun,” Portavós konsellu nasionál profesór kontratadu munisípiu Baucau hateten iha Vila Nova, kinta ne’e.
Ejizensia refere bazea ba dekretu-lei 31/2023 desizaun ME kona-ba teste bolsa kandidatu tanba artigu 11 vinkula ona ba rejime espesiál no husu atu klarifika kona-ba destinu profesór kontratadu nune’e bele hahú hikas prosesu aprendizajen iha sala aula iha kada eskola.
Alende ne’e, profesór kontratadu hirak-ne’e sei kontinua mantein iha kada eskola hodi la fo fatin ba profesór foun sira atu halo kna’ar nu’udar manorin na’in iha sala uala sira.
Bainhira ejizénsia ne’ebé hato’o liuhosi konferensi imprensa mak lahetan resposta hosi parte Ministériu Edukasaun parte konsellu nasionál profesór kontratadu munisípiu Baucau sei organiza malu atu halo manifestasaun hodi hetan solusaun.
Konsellu nasionál profesór kontratadu Baucau konsidera ME la kumpri orientasaun Primeiru Ministru kona-bá setòr edukasaun sai prioridade ba IX Governu Konstituisionál iha tinan-lima mai tanba sei expande to’o área rurál iha teritóriu nasionál.
“Ami profesór kontratadu mantein nafatin pozisaun atu la tuir no partisipa iha kualkér forma teste,” João Freitas akresenta.
Tuir dadus totál profesór kontratadu munisípiu Baucau tinan-2023 hamutuk na’in-277 ne’ebé kontratu remata iha loron-31 dezembru, ne’ebé halao knar nu’udar manorin na’in iha tótal eskola hamutuk 243, komposta hosi pre-eskolár hamutuk 30, ensinu báziku 185, sekundária 23 no tékniku vokasionál hamutuk lima.
Notísia relevante: Profesór na’in-277 hosi Baucau la kontinua kontratu
Jornalista : Natalino Belo
Editór : Evaristo Soares Martins
