Profesór na’in-277 hosi Baucau la kontinua kontratu
BAUCAU, 08 janeiru 2024 (TATOLI) – Profesór hamutuk na’in-277 hosi munisípiu Baucau sei la kontinua serbisu tanba kontratu remata ona iha loron 31 dezembru 2023.
Diretór Serbisu Munisipál Edukasaun Baucau, Augosto Ornai Ximenes, esplika, tuir despaxu hosi Ministériu Edukasaun fó-sai profesór hamutuk hirak-ne’e kontratu remata iha loron-31 dezembru no edukasaun Baucau laiha orientasaun atu haruka atu kontinua serbisu.
“Ida-ne’e kompeténsia ministériu nian,” Diretór Serbisu Munisipál Edukasaun Baucau informa ba Agência TATOLI iha Vila Nova, segunda ne’e
Hosi profesór na’in-277 ne’e mak destaka iha nível pre-eskolár, ensinu báziku, sekundária no tékniku vokasionál hanesan eskola sekundária Dom Carlos Belo suku Afaça, postu Quelicai maioria kontratadu hamutuk na’in-13, voluntáriu na’in-rua no permanente na’in-rua.
Normalmente antes kontratu remata hanesan tinan hirak liubá, iha fulan-novembru funsionáriu kontratu sira extende ona kontratu nune’e to’o tinan letivu foun bele kontinua serbisu maibé to’o agora seidauk entaun kontratu termina ona.
“Impkatu ba prosesu aprendizajen, liuliu tanba la extende pergunta mak funsionamentu eskola, ha’u labele halo komentáriu ba ida-ne’e,” Augusto Ximenes akresenta.
Alende ne’e, funsionáriu rejime jerál hanesan funsionáriu kazuál no termu sertu sira hamutuk 21 ne’ebé durante ne’e serbisu iha edukasaun Baucau sei la kontinua kontratu iha inisiu tinan-ne’e bainhira despaxu hosi Ministériu Admistrasaun Estatál (MAE) hato’o ona ba administrasaun munisipál.
Ministériu Edukasaun rasik tuir planu sei solusiona ba profesór kontratu sira liuhosi maneira kandidatu hanesan liuhosi teste tuir vaga ne’ebé sei fó-sai iha tinan ne’e.
Tuir dadus totál eskola iha munisípiu Baucau hamutuk 243 komposta hosi pre-eskolár hamutuk 30, ensinu báziku 185, sekundária 23 no tékniku vokasionál hamutuk 5.
Jornalista : Natalino Belo
Editór : Evaristo Soares Martins
