Reitór rekoñese problema no hakarak halo esforsu hodi hadi’a kondisaun iha UNTL
DILI, 08 outubru 2024 (TATOLI)–Reitór Universidade Nasionál Timor-Lorosa’e (UNTL), João Soares Martins, rekoñese katak universidade ne’e daudaun hasoru problema ne’ebé estudante sira sempre kestiona, nune’e administrasaun no estrutura tomak hakarak halo esforsu atu hadi’a kondisaun sira.
“Prontu ita hotu rekoñese katak UNTL hanesan universidade públika únika iha Timor-Leste, hasoru problema ne’ebé mak estudante sira kestiona kona-ba limitasaun ein termu saladeaula, ami rekoñese katak sasán sira ne’e iha duni, maibé esforsu ita halo daudaun atubele hadi’a kondisaun iha kada fakuldade,” Reitór hateten iha ninia knaar fatin, UNTL Sentrál, tersa ne’e.
Reitór relata, iha konstrusaun lubuk ne’ebé mak la’o hela, nune’e bainhira finaliza mak sei responde direita ba problema ne’ebé estudante sira sempre kestiona.
“Neste momentu ita iha konstrusaun foun lubuk ida mak la’o hela, kuandu termina ita responde ba kestaun sira-ne’e, liu-liu ita-nia fakuldade Agrikultura ne’ebé sei funsiona tiha ita sei muda ba Hera, entaun aumenta tan fasilidade saladeaula iha sentrál, bele responde ba nesesidade liu-liu ba fakuldade sira iha kampus sentrál, ba fakuldade sira ne’ebé menus saladeaula,” nia hato’o.
Notísia relevante : Dosente balun iha UNTL abandona aula iha FAGRI
Akadémiku ne’e dehan, UNTL sei rezolve problema sira fazeadamente tanba universidade iha misaun ne’ebé tenke la’o tuir.
“Ita mós rekoñese katak situasaun iha semana ikus ne’e halo públiku preokupa, nune’e mós ami preokupa, ami halo mós enkontru dalabarak atu responde ba estudante sira-nia ezijénsia hirak ne’e. Ami tenta haree hela tanba universidade haree uluk ba misaun universidade nia hanesan tripla misaun ba ensinu, peskiza no servisu esensaun komunitáriu. Entaun ita iha disponibilidade haree lai saladeaula atu atende prosesu aprendizajen, depois mak ita fahe ba nesidade sira seluk hanesan mós ita destina ba senadu estudantíl sira ne’ebé laiha espasu ba sira-nia serbisu,” Reitór esklarese.
Iha sorin seluk, Asosiasaun Akadémika Estudantíl Universidade Nasionál Timor-Lorosa’e (AAE-UNTL) kestiona problema ne’ebé estudante enfrenta mak hanesan infraestrutura, jestaun finanseiru no estrutura universidade, nemebé kondisaun ne’e afeta ba estudante sira nia estudu.
“Saladeaula la sufisiente no la garante funsionamentu aula ho efetivu, edifísiu ba departamentu laiha. Situasaun ida-ne’e akontese iha fakuldade Agrikultura iha departamentu Siénsia do Solo, Floresta no Agro Pekuária iha ne’ebé laiha fatin ba funsionamentu administrasaun nian nune’e obriga estrutura hodi okupa kazadebañu ba sala departamentu, kazu ida-ne’e hatudu katak jestaun iha universidade la’o hakdasak no presiza tebes apoiu no intervensaun husi publiku,” Portavós AAE-UNTL, Anita Campos Gama, relata.
Nune’e mós, estudante ne’e konta tuir, laiha projetór difikulta prosesu aprendizajen, liu-liu matéria sira-ne’ebé presiza utiliza projetór.
“Kazu ida-ne’e profesór obriga estudante halo kontribuisaun liuhusi meiu (kobransa ilegál) hodi hola projetór. Odamatan kazadebañu ladi’ak, situasaun ida-ne’e akontese iha universidade no to’o agora universidade seidauk rezolve no husik abandonadu, maski estudante sira kontribui ona osan liuhusi kaixa UNTL,” nia katak.
Jornalista : Osória Marques
Editora : Julia Chatarina
