COVALIMA, 09 Outubru 2024 (TATOLI) – Servisu Munisipál Edukasaun (SME) Covalima seidauk simu relatóriu kona-ba ezekusaun orsamentu ba Programa Merenda Eskolár (PME) husi ekipa jestaun programa (EJP).
Xefe Departamentu Jestaun Programa Edukasaun, Gregório Ferreira Afonso, hateten trimestre dahuluk Covalima la ezekuta PME, tanba orsamentu tama tarde no ezekusaun ba merenda eskolár ne’e iha fali trimestre daruak no datoluk nian.
“Ezekusaun orsamentu ba Programa Merenda Eskolár iha trimestre daruak no datoluk ita seidauk bele fó sai, tanba seidauk simu relatóriu husi ekipa jestaun programa”, Gregório Afonso dehan iha Santa Rosa, ohin.
Daudaun ne’e, orsamentu ba PME jere direta husi EJP no la’ós husi diretór eskola sira, maibé sira halo de’it kontrolu ba implementasaun programa ne’e.
Realizasaun PME bazeia ba kalendáriu no hahú iha trimestre daruak husi Maiu to’o Juñu ho loron efetivu 32 ba totál alunu ensinu báziku 16.026 ho nia proposta orsamentu $215.389,44 no ba alunu pré-eskolár 10.768 ho nia orsamentu $ 23.896,32. Kona-ba trimestre datoluk nian sei hein relatóriu, tanba ne’e seidauk hatene totál alunu ne’ebé han no la han.
Ba trimestre dahaat nian, Edukasaun Covalima submete ona pedidu ba finansa munisipál atu ezekuta orsamentu PME ba Outubru no Novembru nian. Totál orsamentu ba merenda eskolár ba alunu pré-eskolár hamutuk $24.872,40 no ba estudante ensinu báziku $123.759,72.
Alokasaun orsamentu ba PME iha 2024 hamutuk millaun $1, ne’ebé kada estudante iha direitu han sentavu 0,42 hahú iha loron segunda to’o sesta ho totál loron efetivu 181, maibé tanba kestaun orsamentu tarde maka fó han de’it alunu durante loron 139.
Gregório Afonso esplika objetivu implementa PME atu atrai alunu sira-nia partisipasaun iha saladeaula no aumenta sira-nia matenek, tanba estudante mak futuru ba nasaun atu dezenvolve rai ida-ne’e.
Nia fó hanoin katak Edukasaun Covalima lansa, iha 13 Maiu, Programa Merenda Eskolár iha Eskola Bázika Sentrál Suai-Loro.
Notísia relevante: Edukasaun Covalima lansa Programa Merenda Eskolár iha EBC Suai Loro
Jornalista: Celestina Teles
Editora: Maria Auxiliadora
